DILI, 17 agostu 2022 (TATOLI)–Bolseiru timor-oan neen kompostu hosi feto tolu no mane tolu tempu besik sei dezloka bá Surabaya, Indonezia hodi hala’o estudu iha Politeknik Penerbangan (Poltekbang) durante tinan-tolu iha área operasionál, Aviation security (Avsec) no Fire Figting (Bombeiru) ho grau akadémiku diploma III.
Prezidente Konsellu Administrasaun Aeroportu no Navegasaun Aérea Timor-Leste (ANATL), José Trindade da Cruz Pinto, hateten, molok atu hetan kandidatu selesionadu, konsege ultrapasa prosesu lubuk ida hosi preparasaun selesaun dokumentu, teste ekrita teste orál, teste saúde no teste fíziku.
“Prosesu teste sira ne’ebé hala’o hosi ekipa juri sira hosi Poltekbang Surabaya ne’e ho transparánsia no laiha indikasaun ka intevensaun hosi sé de’it, ne’ebé rezultadu ne’ebé ekipa juri aprezenta mai ANATL ne’e moos no laiha nepotizmu. Ita hetan kandidatu neen ne’ebé atu ba hala’o sira-nia estudu iha Poltekbang Surabaya,” Prezidente Konsellu Administrasaun ANATL informa ba Agência Tatoli, iha Aeroportu Internasionál Nicolau Lobato Comoro, kuarta ne’e.
Notísia relevante: Kandidatu bolsa estudu na’in-25 hahú teste saúde-fíziku bá POLTEKBANG Surabaya
Nune’e, ANATL simu rezultadu sira hosi ekipa juri ne’ebé kompostu hosi dosente no ekipa médiku hosi Poltekbang Surabaya, ne’ebé mai fó teste ba kandidatu sira tuir faze durante semana ida iha Timor no rezultadu sei halo publikasaun iha tempu besik tuir desizaun ANATL no Fundu Dezenvolvimentu Kapitál Umanu (FDCH, sigla portugés).
Bolseiru selesionadu sei hetan kontratu hosi ANATL molok dezloka atu kesi sira bainhira ramata estudu durante tinan-tolu.
“Ita-nia alin bolseiru sira ne’e molok dezloka, tuir kritériu ami sei halo kontratu ho sira. Ida-ne’e atu kesi sira no atu motiva sira durante iha prosesu ensinu aprendizajen nia laran,” nia tenik.
Sistema ne’e Administrasaun Aeroportu halo ona ba estudante neen iha faze dahuluk ona, ne’ebé tuir planu sei ramata estudu iha setembru agora.
“Bainhira sira fila, obrigatóriu durante tinan-lima nia laran sira tenke serbisu iha ANATL atubele responde nesesidade rekursu umanu,” nia salienta.
Aleinde ne’e, ANATL orgullu tanba planu dezenvolvimentu rekursu umanu ne’ebé kria sei garante ho ema sira ne’ebé kualidade no kapasidade di’ak bazeia ba disiplina siénsia ne’ebé bolseiru sira hetan iha fatin ne’ebé sira eskola.
“Atu nune’e bele mai aplika fali iha serbisu fatin. Ami sente katak ho rekursu sira ne’ebé iha, fasil ona atu jere sistema ida di’ak iha aeroportu sira tanba ami bele hetan ona ema sira ho kualifikadu akadémiku no esperiénsia,” nia dehan.
Jornalista : Tomé Amado
Editora : Julia Chatarina
