VIQUEQUE, 17 agostu 2022 (TATOLI)—Organizasaun internasionál, Catholic Relief Services (CRS) entrega tan apoiu umanitáriu ba vítima inundasaun sira iha suku Uma-uain kraik, postu Viqueque vila, munisípiu Viqueque.
“Ami mai lori ona hahán emerjénsia ba ita-nia komunidade afetadu inundasaun iha juñu 2022. Antes ne’e ami apoiu uluk ona pakote emerjénsia, maibé ami sente apoiu uluk ne’e ladún sufisiente, tanba ne’e ami kontinua halo distribuisaun pakote emerjénsia daruak ba komunidade efetadu sira. Pakote emerjénsia dahuluk la sufisiente.” Xefe CRS rejiaun Baucau, Alverto dos Reis Freitas, informa, iha suku Uma-uain kraik, kuarta ne’e.
Notísia relevante: Protesaun Sivil Viqueque distribui pakote emerjénsia ba suku Uma-uain Leten
Tuir Responsável ne’e, apoiu dahuluk hodi auguenta ba fulan-ida ka rua de’it.
“Entaun ami analiza, hafoin hahán sira ne’ebé simu uluk ramata maka sei fó impaktu nafatin ba vítima sira. Ho ida-ne’e, ami mai kontinua fó apoia pakote emerjénsia,” nia akresenta.
Apoiu sira kompostu hosi foos, mina no hahán báziku sira seluk inklui fini modo musan hanesan mostarda, fore tali, brinjela no kanko ba vítima sira hodi kuda iha to’os hodi fa’an.
“Ami apoiu fini modo musan hodi kuda iha sira-nia to’os, bainhira sira kuda fini ne’ebé sira simu no karik iha rezultada, sira bele fa’an hodi sustenta sira-nia uma laran. Fini ne’ebé ami oferese, sira kuda hahú agostu to’o novembru,” nia salienta.
Apoiu emerjénsia iha fulan-juñu ba suku haat hanesan Uma-uain Leten, Fatudere, Maluru no Uma-kiik, iha postu administrativu Viqueque vila ba uma-kain 340.
Iha fatin hanesan, Xefe suku Uma-uain leten, Martinho Soares Gusmão, agradese ba organizasaunn CRS ne’ebé fó apoiu ba vítima uma-kain 244 iha suku Uma-uain leten.
Atividade distribuisaun partisipa hosi reprezentante administradór postu Viqueque vila, Komandante autoridade protensaun sivil Viqueque inklui entidade relevante seluk.
Jornalista : Vitorino Loes da Costa
Editora : Julia Chatarina
