DILI, 18 agostu 2022 (TATOLI)–Instituisaun Ensinu Superiór Públiku no Privadu (IESPP) 16 akreditadu hosi totál 18, devolve hikas orsamentu ho montante $1.327.508 ba Ministériu Ensinu Superiór Siénsia no Kultura (MESSK) hodi hatama fali ba kofre Estadu tanba la konsege ezekuta hotu.
Inspetór Jerál MESSK, Higino Alves, hosi IESPP 18 ne’ebé hetan inzensaun propina ba pagamentu semester par, iha instituisaun rua de’it maka konsege ezekuta 100%.
“Ita-nia instituisaun rua ne’e maka Instituto São João de Brito (ISJB) Kasait no Instituisaun Katólika Formasaun Profesór (ICFP, sigla portugés) maibé Instituisaun 16 seluk la ezekuta hotu no tenke devolve hikas osan ba ministériu,” Inspetór Jerál hateten iha ninia knaar fatin, MESSK, Colmera, kinta ne’e.
Notísia relevante: MESSK hapara ona inzensaun propina ba estudante universitáriu
Osan millaun $1,3 la konsege ezekuta hotu ba estudante hamutuk na’in-17.245.
Totál inzensaun propina ne’ebé prevee hamutuk $5.428.394 bazeia ba totál dadus estudante hamutuk na’in-66.106, maibé iha prosesu ezekusaun kuaze iha estudante 48.861 mak hetan direitu ba pagamentu ho montante $4.100.886.
“Akordu ne’ebé halo ona entre ministériu ho IESPP, katak bainhira osan subsídiu ne’ebé Governu transfere ba IESPP 18 ne’e maka la konsege ezekuta hotu tenke devolve hodi hatama filafali ba kofre Estadu,” Ministru akresenta.
Tuir governante ne’e, estudante sira la mai halo konfirmasaun durante prosesu pagamentu tanba ne’e osan la ezekuta.
“Karik balun sai ona ba buka serbisu iha rai-li’ur ou balun mate, tanba ne’e maka sira la konsege hetan direitu ba pagamentu propina ne’e. Ita mós husu ba universidade sira atu halo klarifikasaun tanba saida mak estudante sira ne’e sai no mate ona. Sira dehan katak laiha informasaun hosi estudante sira, tanba ne’e maka sira kontinua tau nafatin depois maka halo verifikasaun,” nia tenik.
Jornalista : Tomé Amado
Editora : Julia Chatarina
