Laiha espasu, negosiante iha suku Uma-uain leten fa’an sasán iha dalan ninin
VIQUEQUE, 18 agostu 2022 (TATOLI)—Negosiante iha suku Uma-uain leten, postu administrativu Viqueque vila, munisípiu Viqueque laiha espasu iha fatin própriu, nune’e bainhira tempu bazar negosiante sira okupa dalan ninin hodi hala’o atividade negósiu.
Tuir Xefe suku Uma-uain leten, Martinho Soares Gusmão, uluk konsege loke merkadu iha suku ne’e hodi halo atividade merkadoria.
“Ami eskolla rai ona hodi kria fatin merkadu, maibé fatin ne’ebá la fó vantajen ba negosiante sira tanba laiha uma merkadu. Ho ida-ne’e negosiante sira mai fa’an fali iha área suku nian, ne’ebé atividade ne’e enterope fali atividade suku maka ami deside negosiante sira muda ba okupa dalan ninin hodi fa’an sira-nia produtu lokál,” Autoridade komunitáriu hateten ba Agência Tatoli, iha sede suku Uma-uain leten, kinta ne’e.
Notísia relevante: Negosiante postu Uatucarbau preokupa ho kondisaun merkadu grave
Antes ne’e, komunidade oferese rai hodi kria merkadu, maibé to’o agora seidauk kria espasu ba atividade negósiu inklui saneamentu.
“Negosiante sira sempre hato’o mai ha’u kona-ba fatin merkadu. Nune’e ha’u mós hato’o tutan ba munisípiu no Governu maibé laiha resposta ruma. Governu maka iha kbiit, ami autoridade hanesan ponte ida hatutan ba maibé seidauk fó konsiderasaun ba povu nia preokupasaun sira,” nia akresenta.
Negosiante hosi suku Fatudere, Maluru no Makadique mak halo negósiu ba merkasu iha suku Uma-uain leten.
“Ami ko’alia oráriu bazár semana ida dala-rua, iha loron segunda no kinta negosiante sira lori sira-nia produtu mai okupa dalan ninin. Ida-ne’e ita haree risku ba konsumidór sira bainhira mai sosa sasán tanba dalan ne’e dalan protokolu ne’ebé karreta no motorizada sira movimentu bá mai,” nia relata.
Nune’e, Xefe suku husu ba ministériu relevante hodi kria fasilidade di’ak ba negosiante sira hodi hala’o atividade negósiu
Jornalista : Vitorino Lopes da Costa
Editora : Julia Chatarina
