DILI, 18 agostu 2022 (TATOLI)–Universidade da Paz (UNPAZ) deside lakohi simu subsídiu apoiu liña internet ne’ebé Ministériu Ensinu Superiór Siénsia no Kultura (MESSK) atribui.
Reitór UNPAZ, Adolmando Amaral, hateten, Governu liuhosi MESSK atribui ona subsídiu liña internet ba Instituisaun Ensinu Superiór Públiku no Privadu (IESPP) sira momentu situasaun COVID-19, maibé ninia velosidade nafatin hela de’it.
“Operadór telekomunikasaun sira konsege hasa’e ona velosidade liña internet, maibé nafatin hela de’it. Agora ministériu hakarak atribui tan subsídiu liña internet, maibé UNPAZ rasik lakohi simu tan. Hanesan de’it, ita simu nafatin subsídiu liña internet maibé ninia velosidade halai lenuk nafatin. Nusa osan sira ne’e ita la halo fali buat seluk ne’ebé bele fó benefísiu ba ita,” Reitór informa via telefónika, kinta ne’e.
Notísia relevante: MESSK bolu atensaun Telemor atu garante velosidade liña internet
UNPAZ lakohi kontinua simu subsídiu liña internet la’ós tanba la gosta ministru.
“Universidade durante ne’e apoiu hela liña internet ba ninia estudante sira ho velosidade 6mb, hafoin hetan tan apoiu 5mb hodi sa’e ba 11mb iha tinan kotuk, maibé rezultadu velosidade internet la’o hakdasak nafatin hela hanesan 6mb ne’ebé UNPAZ fornese daudaun ne’e,” nia akresenta.
MESSK kontinua tau nafatin osan hodi apoiu subsídiu liña internet ba IESPP sira, tanba ne’e Reitór sujere ba ministériu tenke kria ekipa téknika ida hodi halo kontrola internet ne’ebé operadór sira oferese.
Iha fatin ketak, Ministru Ensinu Superiór Siénsia no Kultura, Longuinhos dos Santos, hateten, Governu liuhosi MESSK halo ona kontratu ho operadór Telemor atu garante velosidade liña internet ba IESSP 15 inklui eskola paralela haat iha munisípiu sira.
“Sira-nia kompromisu mai ita maka hakarak garante velosidade liña internet, ne’ebé ita sei haree tanba buat hotu ita asina ona ho sira,” nia dehan.
Promesa operadór telekomunikasaun maka atu garante velosidade liña internet ba IESPP 15 inklui eskola paralela haat ne’e sai hanesan matéria ida, nune’e kuandu sira la kumpre promesa no kompromisu sira ne’e maka MESSK sei bolu atensaun.
Daudaun ne’e prosesu instalasaun liña internet hahú ona, nune’e bainhira finaliza hotu ona maka estudante sira bele asesu ona liña internet.
Jornalista : Tomé Amado
Editora : Julia Chatarina
