DILI, 17 agostu 2022 (TATOLI)–Ministru Ensinu Superiór Siénsia no Kultura (MESSK), Longuinhos dos Santos, bolu atensaun ba operadór telekomunikasaun Telemor, ne’ebé hahú ona instala liña internet ba Instituisaun Ensinu Superiór Públiku no Privadu (IESPP) 15 inklui klase paralela haat atu garante velosidade, nune’e labele difikulta estudante sira asesu matéria.
“Ami husu ba operadór ne’e importante liu maka ninia velosidade. Sira-nia kompromisu mai ita maka hakarak garante velosidade liña internet, ne’ebé ita sei haree tanba buat hotu ita asina ona ho sira,” Ministru informa iha Palásiu Governu, kuarta ne’e.
Notísia relevante: MESSK no Telemor asina akordu fornese liña internet ba IESPP
Tuir nia, promesa operadór telekomunikasaun atu garante velosidade liña internet sai hanesan matéria ida, nune’e bainhira sira la kumpre promesa no kompromisu sira ne’e maka ministériu sei bolu atensaun.
Daudaun ne’e prosesu instalasaun liña internet hahú ona no bainhira finaliza hotu ona maka estudante sira bele asesu ona liña internet.
Jornalista : Tomé Amado
Editora : Julia Chatarina
