MESSK no Telemor asina akordu fornese liña internet ba IESPP

DILI, 16 agostu 2022 (TATOLI)-–Ministru Ensinu Superior, Siénsia no Kultura, Longuinhos dos Santos no Diretór Jerál empreza telekomunikasaun Telemor, Tran Van Bang, asina akordu ida hodi fornese liña internet gratuita ba Institutu Ensinu Superiór Públiku no Privadu (IESPP) sira.
Iha biban ne’e, Ministru hateten, intensaun apoiu liña internet ne’e nu’udar medida ida atu apoia estudante sira bele halo peskiza sientífika inklui garante kualidade ensinu distánsia ne’ebé estabelese ona.
“Iha tinan kotuk ita aloka ona osan hamutuk $293.000 hodi fornese liña internet gratuita ba Institutu Ensinu Superiór sira,” governante ne’e informa foin lalais iha salaun MESSK, Colmera.
Notísia relevante: MESSK prevee $354.000 hodi apoiu internet no extrakurrikulár IESP 16
Benefisiáriu sira ne’ebé sei asesu direita ba programa liña internet maka estudante sira ne’ebé hala’o estudu iha IESPP hamutuk 15 inklui polo haat ne’ebé akreditadu hosi Institutu Superiór Cristal (ISC) Baucau, Manufahi no Dili Institute of Technology (DIT) iha Bobonaro.
“Daudaun Univercidade da Paz (UNPAZ) rasik rejeita atu asesu apoiu liña internet ne’ebé Governu fornese tanba tuir informasaun sira iha kapasidade rasik atu fornese liña internet ba estudante. UNPAZ iha nia kapasidade rasik atu fornese liña internet ba estudante sira, tanba ne’e ami fó de’it ba universidade sira ne’ebé persiza,” nia tenik.
Programa apoiu liña internet ba estudante sira ne’e antes Governu implementa ona iha ámbitu Estadu Emerjénsia tanba krize provokadu hosi COVID-19.
Iha fatin hanesan, Diretór Jerál empreza Telemor, Tran Van Bang, konfesa katak empreza ne’e garante sei fornese liña internet ho kualidade ba estudante sira atubele utiliza asesu ba matéria iha ámbitu ensinu aprendizajen.
“Ami asina ona kontratu ho Ministériu Ensinu Superior, Siénsia no Kultura, tanba ne’e ami sei garante 100% bele fornese liña internet ho kualidade ba estudante sira,” nia tenik.
Jornalista : Tomé Amado
Editora : Julia Chatarina

