DILI, 06 juñu 2022 (TATOLI)—Ministériu Ensinu Superiór Siénsia no Kultura (MESSK) asina akordu ho Instituisaun Ensinu Superiór Privadu (IESP) 16, segunda ne’e, ba implementasaun programa apoiu liña internet no atividade extrakurrikulár hodi fasilita prosesu ensinu aprendizajen ba dosente no estudante.
Tuir Ministru Ensinu Superiór Siénsia no Kultura, Longuinhos dos Santos, fundu ne’ebé prevee iha Orsamentu Retifikativu atu apoiu programa MESSK no Ministériu Edukasaun Juventude no Desportu (MEJD), maibé kuandu presiza halo proposta hodi bele asesu.
“Ita rasik submete ona proposta hodi husu fundu hamutuk $300.000 atu apoiu liña internet ba Instituisaun Ensinu Superiór Públiku no Privadu 16, la inklui Universidade Nasionál Timor-Lorosa’e (UNTL) no Institutu Politékniku Betanu (IPB), enkuantu ba atividade extrakurrikulár nian ita sei prevee $54.000,” Ministru Longuinhos hateten hafoin ramata asina akordu ho IESP 16 iha salaun Otél Novo Turismo, Bidau Lecidere, segunda ne’e.
Notísia relevante: Estudante ensinu superiór 30,311 asesu liña internet
Nia dehan, apoiu rua ne’e hodi estudante sira bele promove formasaun ne’ebé integradu no iha espíritu amizade, inklui atu promove kapasidade empreendedorizmu ba estudante sira rasik.
“Polítika ministériu mak atu kria planu no programa, liu-liu atu apoiu Instituisaun Ensinu Superiór Privadu iha nasaun ne’e atu hadi’a liután sira-nia kualidade. Tanba ko’alia kona-ba kualidade, aliña ho planu estratéjiku dezenvolvimentu nasionál ne’ebé ezije Instituisaun Ensinu Superiór Privadu sira hotu atu partisipa iha edukasaun no formasaun ne’ebé kualidade,” governante ne’e akresenta.
Tanba ne’e, Ministru husu ba Reitór sira, bainhira eventu asina akordu ne’e ramata, no planu inklui programa ne’e desentraliza ona ba IESP, maka tenke utiliza orsamentu ho rigór no transparénsia, nakonu ho responsabilidade, atu nune’e bele hetan nafatin konfiansa hosi Governu hodi fó nafatin apoiu.
Iha biban hanesan, Reitór Instituto of Business (IOB), Pedro Ximenes reprezenta Instituisaun Ensinu Superiór Públiku 16, hato’o agradesimentu ba Governu tamba kontinua ho kompromisu hodi ajuda nafatin.
“Ho esforsu hosi Ministru no ekipa ministériu tomak maka Instituisaun Ensinu Superiór Públiku sei esforsu ho ninia kbiit tomak hodi jere apoiu sira ne’e ho responsabilidade,” nia dehan.
Jornalista : Tomé Amado
Editora : Julia Chatarina
