MKI arrekada reseita rihun $16 ba kofre Estadu
DILI, 13 Novembru 2026 (TATOLI) – Ministériu Komérsiu no Indústria (MKI) rekolla reseita rihun $16 liuhusi sistema dijitál foun ne’ebé instituisaun ne’e introdús atu fó lisensa komersiál no industriál ba empreza sira.
Diretór-Jerál Komérsiu, Elias de Jesus, hatete katak sistema rejistu dijitál foun ne’e hahú lansa iha fulan-Abríl 2026.
“Hahú husi sistema ne’e estabelese to’o horisheik, ita rekolla reseita $16.395 husi atividade lisensiamentu komersiál no industriál ba empreza 246”, Diretór-Jerál Komérsiu, Elias de Jesus, hatete ba Tatoli, ohin.
Nia esplika katak rejista dijitál ba lisensa komérsiu no indústria importante tebes tanba hamenus prosedimentu burokrasia, aselera prosesu aprovasaun no aumenta transparénsia ba emprezáriu no ajente ekonómiku sira.
Dirijente ne’e hatete katak atu hetan lisensa komersiál no industriál, emprezáriu sira tenke rejista uluk iha Servisu Rejistu no Verifikasaun Emprezariál (SERVE, I.P), ne’ebé sei verifika dokumentu sira ne’ebé aprezenta. Bainhira dokumentu kompletu ona, SERVE sei haruka ba MKI atu kontinua prosesu lisensiamentu komersiál ka industriál.
Tuir nia, diferente ho sistema anteriór, agora lisensa ne’ebé aprova ona sei haruka diretamente ba emprezáriu sira-nia enderesu e-mail, nune’e sira la presiza mai foti lisensa iha ministériu. Ho sistema ne’e, emprezáriu sira bele imprime rasik lisensa no uza dokumentu ne’e atu hatudu ba autoridade kompetente katak sira iha autorizasaun atu hala’o atividade komersiál ka industriál.
Nia subliña katak sistema dijitál ne’e fasilita setór privadu atu legaliza sira-nia atividade ekonómika, ne’ebé bele kontribui ba aumenta fonte rendimentu Estadu nian. Ida-ne’e tanba emprezáriu sira selu taxa lisensiamentu liuhusi banku, ne’ebé sai kontribuisaun ida ba reseita doméstika no esforsu Estadu nian atu hamenus dependénsia ba reseita petróleu.
Notisía relevante: Sistema dijitál foun fasilita MKI fó lisensa industriál no komersiál ba empreza 174
Jornalista: Arminda Fonseca
Editora: Maria Auxiliadora
