DILI, 19 agostu 2022 (TATOLI)—Estudante Fakuldade Edukasaun Arte Umanidade (FEAH) hosi Universidade Nasionál Timor-Lorosa’e (UNTL) Rosa Marques Martins, husu ba foin-sa’e no entidade hotu atu kontinua valoriza nafatin luta ne’ebé Forças Armadas da Libertação Nacional de Timor-Leste (FALINTIL) sira oferese ona ba rai ida-ne’e.
“Husu ba jerasaun foun sira iha bairru atu kria unidade, amizade no responsabilidade nu’udar timor-oan, atu nune’e hamutuk lori rai ida-ne’e ba situasaun hakmatek,” Estudante ne’e hateten ba Agência Tatoli iha UNTL Liseu, sesta ne’e.
Nia mós konsidera presiza kontribuisaun líder komunitáriu sira hahú hosi xefe suku, xefe aldeia delegada no delegadu sira hodi hakbesik-an nafatin ba jerasaun foin-sa’e sira hodi kria diálogu ho komunidade no buka hatene komunidade nia hakarak ba dezenvolvimentu iha suku laran.
Iha ámbitu komemorasaun loron FALINTIL ba da-47, nia husu entidade hotu koopera hamutuk halo kontrola ba estabilidade rai-laran.
Notísia relevante: Hametin pás-dezenvolvimentu tenke hatuur valor luta-na’in atu liberta povu
Aleinde ne’e, nia husu jerasaun foun sira atu banati tuir luta FALINTIL ba rai-ne’e no tenke iha obrigasaun sai sidadaun di’ak hodi fó kontribuisaun ba dezenvolvementu nasaun liuhosi estuda maka’as atu sai jerasaun kontinuadór ne’ebé preparadu troka filafali jerasaun antigu sira iha futuru.
“Husu ba líder sira iha forsa nia laran atu kontinua fó nafatin formasaun ba jerasaun foin-sa’e sira ne’ebé sai ona membru iha Forsa Defeza nia laran, atu nune’e bele hetan formasaun adekuadu hodi prepara-an ba futuru,” nia akresenta.
Estudante ne’e konsidera, FALINTIL nu’udar liman kro’at povu nian tanba durante tinan 24 nia laran sira luta hodi liberta povu no rai ida-ne’e hosi inimigu nia ukun.
“Ha’u labele imajina oinsá ita-nia aman FALINTIL sira bele organiza-an durante tinan 24 iha ai-laran, oinsá sira bele ultrapasa susar no terus ne’ebé sira hasoru iha kombate nia laran,” Rosa Marques tenik.
Estudante ne’e dehan, kontribuisaun boot ne’ebé lutadór sira fó ona maka liberta povu no rai ida-ne’e, ne’ebé hanesan valór boot ida ne’ebé signifikante tanba ho FALINTIL ninia ezisténsia ohin loron povu rai ida-ne’e bele goza liberdade.
Ba nia, prezensa FALINTIL atu fó hanoin ba povu no jerasaun foun katak luta no ezisténsia ne’ebé Forsa Armada fó ba rai ida-ne’e maka ohin loron hetan ona independénsia no Timor-Leste konsege sai ona nasaun soberanu no Estadu.
Jornalista : Tomé Amado
Editora : Julia Chatarina
