DILI, 19 agostu 2022 (TATOLI)–Ministériu Finansa (MF) liuhosi Diresaun Jerál Estatístika lansa relatóriu mensál Índise Presu Konsumidór (IPK) ba jullu 2022, ne’ebé hatudu iha mudansa persentajen IPK grupu hotu menus oitoan +0,3% kompara ho fulan-juñu sa’e mós +1,6%.
“Mudansa presu grupu hotu ho mensál +0,3% tanba hetan kontribuisaun hosi grupu hahán no bebida la’ós alkoolika +0,3%, transporte +2,0%, no alkoolika no tabaku +0,1. Enkuantu, hatais no sepatu -0,1% sai hanesan mudansa kontráriu ba inflasaun grupu hotu,” Diretór Jerál Estatístika, Elias dos Santos Ferreira, informa, liuhosi nota ne’ebé Agência Tatoli asesu, sesta ne’e.
Hahán no bebida la’os alkoolika +0,3% sa’e tamba hetan impaktu maioria hosi sub grupu modo tahan +1,7%, masin-midar, marmelada, bani-been, cokolate no hahán midar +1,5%, aifuan +0,4, ikan no hahán tasi +0,1%, susu-been, keju, no manu-tolun -0,3%, foos -0,3%, paun no sereál -0,4% no mina no bokur -0,9 sai hanesan mudansa kontráriu ba inflasaun grupu hahán no bebida la’ós akoolika.
Notísia relevante: IPK grupu hotu sa’e +0,6% iha juñu
Mudansa persentajen IPK anuál sa’e +8,2% kompara entre jullu 2022 ho jullu 2021, ne’ebé hetan kontribuisaun hosi grupu hahán no bebida la’ós alkoolika +8,5%, transporte +16,8%, alkoolika no tabaku +26,9%, uma +2,4%, ekipamentu no manutensaun mobiliáriu uma-laran +4,0%, rekreasaun no kultura +2,0%, saúde +1,0%, edukasaun +2,4% no komunikasaun +0,1% ba annuál jullu 2022.
“Grupu hatais no sepatu -0,2% sai hanesan mudansa kontráriu ba inflasaun grupu hotu anuál jullu 2022,” nia akresenta.
Nune’e, inflasaun tradeable sa’e +0,9% no non-tradeable laiha mudansa +0,0% iha mensál kompara entre juñu 2022 ho maiu 2022.
Inflasaun tradeable sa’e +0,3% no non-tradeable sa’e +0,0% iha anuál
kompara entre jullu 2022 ho juñu 2022. Inflasaun tradeable sa’e +11,0% no non-tradeable sa’e +1,4% iha annuál kompara entre jullu 2022 ho jullu 2021.
Jornalista : Antónia Gusmão
Editora : Julia Chatarina
