Samsung hakarak kapasita joven timoroan iha área siénsia no téknolojia

DILI, 19 agostu 2022 (TATOLI)—Prezidente Repúblika (PR), José Ramos Horta, sesta ne’e, hala’o audiénsia ho Ekipa Komunikasaun Koorporativa hosi Samsung Eletróniku hodi ko’alia kona-ba programa ho naran Corporate Social Responsibility (CRS) no sols for tomorrow atu kapasita joven sira iha Timor-Leste.
Notísia Relevante: Ekipa komunikasaun korporativa Samsung hasoru PM introdús programa CRS
Prezidente Ekipa Komunikasaun Koorporativa hosi Samsung, In-Yong Rhee, hateten objetivu hosi enkontru ne’e ko’alia kona-ba programa projetu Samsung nian bolu Corporate Social Responsibility (CSR) ho programa sols for tomorrow, ne’ebé foka ba oinsá atu fó formasaun iha área siénsia no teknolójia ba iha joven sira no forma bele adapta an ho teknolójia ne’ebé agora la’o daudaun.
“Atu rezolve problema ne’ebé akontese iha rai liu-liu kontribui ba sosiadade ida-ne’e no programa ida0ne’e, ami planu atu ba halo tinan lima no mós ba iha futuru nian,” In-Yong Rhee hateten hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Programa CSR ida-ne’e ho tema edukasaun ba joven no programa sols for tomorrow, ida-ne’e mak atu kapasita joven iha área sira hanesan siénsia teknolójia, matemátika no enjenária no programa ida seluk Samsun inovation ne’ebé atu harii kampus ida oinsá forma juventude iha área ne’ebé presiza.
Nune’e, nia espera programa ida-ne’e bele kontribui ba iha dezenvolve joven sira ninia abilidade liu-liu iha siénsia teknolójia no mós iha área sira seluk tan iha Timor-Leste.
Hafoin aprezenta programa ne’e, Xefe Estadu mós fahe nia esperiénsia kona-ba istória Korea ho Timor-Leste ne’ebé hanesan loloos de’it tanba Korea uluk iha pasadu enfrenta situasaun krize hanesan iha Timor-Leste.
PR espresa ninia prontidaun kontinua hadi’a no haforsa kle’an liután relasaun entre Korea ho Timor-Leste iha futuru iha área ne’ebé presiza.
Bibán ne’e, husu ba PR karik iha disponibilidade bele ba vizita Korea no mós atu vizita kompañia Samsun iha Korea.
“Husu mós Prezidente Repúblika atu kontribui iha área responsabilidade sosiál hanesan kompañia atu fó fila ba sosiadade, saida mak presiza no saida mak nia sita atu ami dezenvolve,” nia hateten.
Durante sorumutu, Prezidente Ekipa Komunikasaun Koorporativa hosi Samsung hakarak agradese ba Estadu Timor Leste apoiu Korea atu organiza expo 2023.
Jornalista : Nelson de Sousa
Editór : Cancio Ximenes

