VIQUEQUE, 19 agostu 2022 (TATOLI)–Administradór postu Uatucarbau, munisípiu Viqueque, Alfredo dos Santos, hamutuk ho delegasaun sira iha postu Uatucarbau realiza diálogu komunitáriu ho abitante sira iha suku Afaloikai hodi rona preokupasaun.
“Ho diálogu ne’e ha’u bele apar ho komunidade nia preokupasaun. Preokupasaun sira ne’ebé komunidade enfrenta maka estrada ne’ebé liga mai suku, eletrisidade no bee-moos. Preokupasaun sira ne’ebé sira hato’o, ha’u sei lori ba ministériu kompetente hodi tau atensaun,” Administradór postu Uatucarbau, Alfredo dos Santos, hateten hafoin ramata diálogu, iha suku Afaloikai, sesta ne’e.
Notísia relevante: Aldeia rua iha suku Afaloikai Viqueque ho inisiativa loke dalan
Durante diálogu, Autoridade postu ne’e husu ba líder komunitáriu sira hodi tau-matan ba populasaun sira iha suku.
“Ha’u husu xefe suku no xefe aldeia sira tenke tau-matan no kontrola komunidade. Karik sira enfrenta buat ruma tenke relata mai ha’u,” nia akresenta.
Iha fatin hanesan, Xefe suku Afaloikai, Agustinho Pinto, informa, daudaun suku Afaloikai iha aldeia haat ho abitante hamutuk 1.939 hosi uma-kain 365.
“Iha suku ne’e, aldeia Darlari no Caiualita mak seidauk asesu dalan no liña eletrisidade. Tanba ne’e ami husu ministériu kompetente bele tau-atensaun ba populasaun sira-nia preokupasaun,” nia tenik.
Suku Afaloikai iha aldeia rua maka asesu ona liña eletrisidade, enkuantu aldeia rua seluk seidauk.
Tuir dadus, aldeia Lacohu no aldeia Lacoala ne’ebé seidauk asesu liña eletrisidade iha populasaun hamutuk 278 hosi uma-kain 128.
Diálogu ne’e partisipa hosi xefe suku no xefe aldeia haat iha suku Afaloikai inklui abitante purvolta 230.
Tuir planu Administradór postu Uatucarbau semana oin sei kontinua halo diálogu ho abitante sira iha suku Loiulu.
Jornalista : Vitorino Lopes da Costa
Editora : Julia Chatarina
