VIQUEQUE, 18 agostu 2022 (TATOLI)—Suku Uma-uain leten, postu administrativu Uatulari, munisípiu Viqueque benefisia programa hitu hosi implementasaun Programa Mão de Obra Postu Administrativu (PMOPA).
Atividade hitu ne’ebé implementa maka halo lutu ba sede suku, kuda ai-oan iha mota Luga-Asa, hamoos semitériu Luga-Asa, hamoos baleta, kee bee dalan, halo lutu semitériu no halo
limpeza tuir estrada ninin, ne’ebé programa ne’e sei ramata iha novembru tinan ne’e.
“Ami implementa PMOPA ba tinan ne’e, ne’ebé benifisia programa hitu hodi implementa iha atividade hitu iha ami-nia suku,” Xefe suku Uma-uain leten, Martinho Soares Gusmão, hateten iha sede suku, sesta ne’e.
Notísia relevante: Balibo implementa atividade neen iha PMOPA faze dahuluk
Governu implementa PMOPA kada tinan ne’ebé kria kampu serbisu ba komunidade iha baze.
“Ha’u sente programa ne’e di’ak tanba Governu implementa kada tinan hanesan kria kampu serbisu ida ba komunidade iha baze,” nia akresenta.
Nune’e, nia husu Governu tau ba dekretu-lei ruma atu PMOPA labele lakon, tanba Governu kuandu troka malu programa ne’e bele lakon.
“Ita haree bainhira programa ne’e implementa iha suku maka ita haree ambiente sai moos hotu. Ho ida-ne’e ha’u agradese ba Governu ne’ebé implementa programa ne’e,” nia hato’o.
Iha implementasaun programa iha suku Uma-uain leten envolve abitante hamutuk 140 no kada loron ema ida hetan $5.
Orsamentu ba implementasaun PMOPA iha suku Uma-uain leten hamutuk $13.500.
Jornalista : Vitorino Lopes da Costa
Editora : Julia Chatarina
