OÉ-CUSSE, 20 agostu 2022 (TATOLI)–Prezidente Autoridade Rejiaun Administrativa Espesiál Oé-cusse Ambeno (RAEOA), Arsénio Paixão Bano, informa, prosesu reabilitasaun no melloramentu ba projetu estrada nasionál hosi Pante Makasar bá sub-rejiaun Oésilo prosesa ona Rejime Jurídiku Aprovizionamentu.
“Iha fulan-ida ita sei hahú projetu estrada nasionál hosi Tono ba Oésilo, daudaun iha hela prosesu aprovizionamentu. Ita Oé-cusse tenke orgullu maibé tennke servisu maka’as hodi koopera dudu dezenvolvimentu kontinua la’o no labele para,” Autoridade RAEOA hateten iha ninia knaar fatin, sábadu ne’e.
Notísia relevante: RAEOA hatuur fatuk dahuluk ba projetu estrada nasionál Pante Makasar-Nítibe
Aleinde ne’e, estrada iha viziñu Nusa Tenggara Timur (NTT) iha distritu Timor Tenggah Utara (TTU) Kefamenanu, progresu dezenvolvimentu ba estrada halo haleu hotu liña fronteira sira.
Nune’e, Timor-Leste espesialmente Oé-cusse mós tenke mellora nia estrada sira tanba Oé-cusse mak sai lalenok ba komunidade iha sorin.
“Ita tenke hatudu ita-nia, estrada nasionál Oésilo no finalidade ba fururu sei liga Oé-cusse direita ba Kefamenanu, tanba ne’e ita tenke servisu maka’as, tanba iha sorin dezenvolvimentu la’o maka’as, entaun ita mós tenke maka’as,” nia akresenta.
Iha fatin ketak, Diretór Diresaun Rejionál Infraestrutura RAEOA, Candido Dos Reis Amaral, informa, Autoridade RAEOA lansa ona konkursu ba konstrusaun estrada Tono bá Oésilo iha semana kotuk.
“Entaun ita hein iha tempu badak interesadu empreza sira bele tuir rekezitu sira ne’ebé ita tau no ita mós konfirma empreza internasionál sira tanba ne’e relasiona ho kapasidade, entaun iha tempu badak sira mai foti ona dokumentu, la kleur tan sira halo submisaun ita bele hatene ona empreza manán-na’in ba projetu ne’e,” nia tenik.
Distánsia ba projetu estrada nasionál ne’e hamutuk kilómetru 18, ne’ebé sei hahú hosi eis merkadu Tono suku Cunha, ne’ebé envolve suku Bobokase no Naimeko, partense ba sub-rejiaun Pante Makasar, fronteira Napan suku Bobometo sub-rejiaun Oésilo.
Jornalista : Abílio Elo Nini
Editora : Julia Chatarina
