Ekipa konjunta detein tan suspeitu haat kazu asaltu membru PSHT
DILI, 20 agostu 2022 (TATOLI)–Ekipa konjunta kompostu hosi Servisu Informasaun Polísia (SIP), ekipa Makikit no Unidade FALINTIL-Forsa Defeza Timor-Leste (F-FDTL) kontinua halo operasaun hodi detein tan suspeitu haat seluk iha sesta (19/08), ne’ebé komete kazu asaltu no tentativa omisidu ba membru Grupu Arte Marisiál (GAM) hosi Persaudaraan Setia Hati Terate (PSHT).
Kazu asaltu ne’e akontese iha suku Vila-Verde hafoin membru PSHT sira simu graduasaun no fila ba ida-idak nia uma no rezulta vítima feto na’in-rua no mane na’in-tolu hetan kanek grave.
Hafoin detein suspeitu AJG, liuhosi prosesu identifikasaun ne’ebé ekipa hala’o iha edifísiu Servisu Investigasaun Kriminál Nasionál (SIKN), suspeitu deklara katak iha tan autór seluk.
“Suspeitu haat ne’ebé detein mak hanesan JRX, JLCA, JNJ no JDV. Sei iha tan autór ualu ne’ebé envolve iha kazu asaltu membru PSHT na’in-lima iha área Vila-Verde,” refere nota ne’ebé Agência Tatoli asesu, sábadu ne’e.
Notísia relevante: Ekipa Konjunta detein suspeitu ida ba kazu tentativa omísidu hasoru membru PSHT
Ekipa konjunta detein JRX iha área Vila-Verde, JLCA iha Tuana-laran, JNJ iha Matadoru no JDV entrega-an rasik iha edifísiu SIKN.
Oras ne’e daudaun ekipa kontinua halo vijilánsia hodi buka tan suspeitu seluk ne’ebé identifikadu ona hodi lori ba edífisiu SIKN no presta deklarasaun.
Jornalista : Natalino Costa
Editora : Julia Chatarina
