DILI, 20 agostu 2022 (TATOLI)—Komandu FALINTIL-Forsa Defeza Timor-Leste (F-FDTL), sábadu ne’e, halo misa agradesimentu iha ámbitu komemorasaun aniversáriu Forsa Armada Libertasaun Nasionál Timor-Leste (FALINTIL) ba da-47.
Iha biban ne’e, Amu selebrante no atuál Vigáriu Dioseze Dili, Padré Juvito do Rego, hateten, komemorasaun loron FALINTIL tinan ne’e atu dignifika eroi no sira hotu ne’ebé fó vida ba prosesu luta libertasaun nasionál.
“Oportunidade ida-ne’e ita hotu hahí eroi hotu ne’ebé mate ona no hirak ne’ebé sei moris. Sira hakerek ona istória ho ran no kosar ben. Mai ita dignifika, fó ondra ba sira ba dedikasaun durante tinan 47 nia laran,” Padre Juvito do Rego dehan durante nia omília bainhira prezide misa iha Igreja Motael, Farol.
Notísia relevante: F-FDTL oferese ai-han ba komunidade iha ámbitu aniversáriu FALINTIL ba da-47
Amu Juvito konsidera, FALINTIL naran istóriku no hakerek ona iha povu Timor-Leste nia luta.
“Parabéns ba imi-nia dedikasaun no luta ba dignidade povu. Tinan 47 liubá, barak mak mate tanba iha invazaun iha loron 07 dezembru, ema hotu halai ba ai-laran no mate. Ita agradese tanba iha FALINTIL ne’ebé sai liman kroat no defende povu ba prosesu luta libertasaun. Obrigadu ba sira ne’ebé mak dedika-an tomak ba rai no sei moris. FALINTIL naran istóriku ida ne’ebé maka hakerek iha istória povu,” nia akresenta.
Tuir Amu selebrante, FALINTIL hanesan Joshua ne’ebé Maromak hili hodi substitui Musa hodi lori povu ejiptu ba mota Jordaun, ho responsablidade ne’ebé maka bele kompara hanesan FALINTIL sai liman kroat povu nia iha situasaun difísil hodi kontinua hamutuk defende povu to’o hetan objetivu ba libertasaun.
“Tanba imi liman kroat povu, entaun imi labele sai kroat ba povu. Imi mai hosi povu, serví povu no fila ba povu, imi-nia knaar tomak ne’ebé imi hala’o, imi-nia serbí no imi-nia terus ami la haluha ida-ne’e,” nia tenik.
Nune’e, Amu Juvito husu ba FALINTIL ne’ebé transforma-an ona ba F-FDTL hodi kontinua hatudu prfisionalizmu iha sosiadade nia le’et.
“Imi-nia profisionalizmu sai modelu ba parte hotu iha nasaun ne’e. Entaun imi-nia prezensa la’ós atu sai ameasa maibé atu asegura nasaun no povu. Tanba F-FDTL atu serví povu atu asegura moris iha hakmatek no estabilidade nia laran. F-FDTL kontinua dezenvolve-an ba bebeik atu loron ida sai profesionaliza. Nasaun ida-ne’e iha ita-boot sira-nia liman. Estadu no povu ida ne’e iha ita-boot sira-nia liman. Imi sai hanesan insitutisaun ne’ebé hatene respeita no hatudu dispilina. Tenke defende pás no estabilidade iha nasaun,” nia fó hanoin.
Hafoin missa agradesimentu, Xefe Estadu Maiór Jenerál F-FDTL Tenente Jenerál Falur Rate Laek hamutuk ho Xefe Estadu Forsa Armada hosi nasaun Portugal, Austrália no Indonézia inklui veteranu FALINTIL sira kari ai-funan iha Portu Dili no Jardin Eroi Metinaro, Santa Cruz no Taman Makam Palawan Seroja hodi fó ondra ba eroi sira.
Tema na selebrasaun loron aniversariu ba FALINTIL ba da-47 iha tinan ne’e maka “Increcimento os valores das FALINTIL nos Processos Reconstrução nacional. Homenegear memória dos mártires da patria.”
Jornalista : Natalino Costa
Editora : Julia Chatarina
