DILI, 20 agostu 2022 (TATOLI)-–Komandu FALINTIL-Forsa Defeza Timor-Leste (F-FDTL), tein ai-han hodi oferese ba komunidade iha kapitál Dili iha ámbitu komemorasaun aniversáriu Forsa Armada Libertasaun Nasionál Timor-Leste (FALINTIL) ba da-47.
“Atividade ne’e realiza nu’udar asaun ida hodi dignifika valór sira ne’ebé halo ona. Ha’u iha projetu ida ne’ebé sei realiza hanaran ilustrasaun no rekuperasaun memória, ne’ebé sei kontinua iha tinan oin,” Xefe Estadu-Maiór F-FDTL, Tenente Jenerál Falur Rate Laek, hateten, iha ámbitu fahe ai-han ba populasaun sira iha resintu Palásiu Prezidensiál, Bairru Pité, sábadu ne’e.
Notísia relevante: Aluc: “Loron FALINTIL tenke dignifika veteranu ne’ebé liberta povu-rai TL”
Falur dehan, forsa armada moderna halo ninia relasaun ho komunidade atu lori valór sira ne’ebé uluk FALINTIL halo, tanba lema forsa guerilla nian katak FALINTIL mak bee no bee ne’e mak povu.
“Agora ita la uza ona lema ne’e, tanba ne’e lema guirileiru sira-nia. Agora iha forsa modernu ne’e halo aprosimasaun ho povu katak forsa povu nian, ezemplu ema hakarak ameasa ita sei labele tanba povu tomak sei hambriik kontra nia tanba forsa ne’e povu nian,” nia akresenta.
Tanba kbiit lojístika F-FDTL nian, entaun atividade fahe ai-han ne’e hala’o de’it iha fatin hirak iha Dili hanesan área Palásiu Prezidensiál, Palásiu Governu, Tasi-tolu, Becora, no Balide, inklui jardín BJ Habibie iha Lecidere, nune’e mós iha prizaun Becora.
Biban hanesan, membru Parlamentu Nasionál, Deputada Olinda Guterres, apresia tebes ho inisiativa ne’e tanba valoriza ona FALINTIL sira liuhosi eventu importante sira ne’e.
“Ha’u ohin ba tiha kari aifunan iha Palásiu Governu nia oin no komisaun informa katak iha fatin hirak iha Dili laran FALINTIL sira oferese ai-han, entaun ha’u deside mai iha Palásiu Prezidente nian. Aktu ne’e ida di’ak tebes hodi hatudu katak FALINTIL sira kondidera povu tanba sira mak ita no ita mak sira,” Reprezentante povu ne’e subliña.
Ai-han hirak ne’ebé prepara hosi membru F-FDTL sira mak hanesan paun, na’an, bebida no ai-han seluk tan.
Jornalista : Antónia Gusmão
Editora : Julia Chatarina
