DILI, 19 agostu 2022 (TATOLI)–Brigadeiru Jenerál FALINTIL-Forsa Defeza Timor-Leste, João Miranda “Aluc Descartes”, konsidera loron Falintil mak loron istóriku ba prosesu luta libertasaun povu Timor-Leste, tanba ne’e tenke respeita no dignifika veteranu sira-ne’ebé liberta rai no povu Timor-Leste.
Notísia Relevante: Taur: “20 agostu ita deklara insurreição geral luta ba ukun rasik an”
“Tanba ne’e, iha selebrasaun loron FALINTIL ne’e tenke respeita no dignifika veteranu ne’ebé mak liberta ona rai no povu ida-ne’e,” Aluc hateten ba Agência Tatoli, relasiona ho komemorasaun aniversáriu Forças Armadas da Libertacao Nacional de Timor-Leste (FALINTIL) ba dala-47 (20 agostu 1975-20 agostu 2022) ne’ebé ho tema “Incrementar os Valores das FALINTIL no Processo de Reconstruçao Nacional”, iha Sentru Konvensaun Dili (CDD, sigla portugés), kinta ne’e.
Entretantu, Presidente do Conselho Pastoral da Diocese de Díli, Padre Juvito do Rego, husu ba Falintil-Forsa Defeza Timor-Leste (F-FDTL) atu labele kria krize entre forsa armada ho povu no polísia ho instituisaun seluk.
“Forsa no Defeza mak asume papél importante ba kontinuidade rezisténsia armada nian. Ho ida-ne’e, ami husu forsa ne’ebé profisionál iha nia servisu sira. Iha mundu agora, la identifika forsa armda ho nia kuantidade ekipementu funu nian, maibé importante liu mak tuir regra sira,” nia dehan.
Pe. Juvito do Rego mós elojia políitka Governu no instituisaun F-FDTL nian hodi haruka nia membru sira atu kapasita tan sira-nia kuiñesimentu ba membru sira iha nasaun oioin ne’ebé ho nia misaun dame.
“Ha’u husu ba membru F-FDTL atu diginfika ninia instituisaun, la espera ne’e dignifiksaun povu nian,” nia hateten.
Diretór Ezekutivu Asosiasaun HAK, Xisto dos Santos, kongratula F-FDTL ne’e selebra aniversáriu Falintil ba dala-47 ne’e.
“Ita hasoru dezafiu ida agora mak funu konvensionál. Ne’eduni, husu ba F-FDTL atu dignifika espiritu lutadór sira-nia misaun,” nia dehan.
Jornalista : Osória Marques
Editór : Cancio Ximenes
