Dezenvolvimentu Timor-Leste atraza impaktu hosi instabilidade polítika
DILI, 22 agostu 2022 (TATOLI)—Eis Komisáriu Nasionál Comissão de Acolhimento, Verdade e Reconciliação de Timor Leste (CAVR), José Estevão Soares, hateten dezenvolvimentu rai-laran atraza tanba impaktu hosi instabilidade polítika.
Notísia Relevante: Ukun an tinan 20 maibé dezenvolvimentu estagnadu
“Dezenvolvimentu atraza tanba impaktu hosi instabilidade polítika entre líder nasionál,” José Estevão Soares hateten ba Agência Tatoli, Relasiona ho komemorasaun aniversáriu loron Konsulta Populár ba dala-XXIII (30 agostu 1999-30 agostu 2022) ho tema “Ho espiritu loron konsulta populár 30 agostu 1999 mai ita hametin pás no estabilidade ba dezenvolvimentu iha ita-nia rai Timor-Leste”, iha Jardim 05 de Maio, Colmera, Dili.
Tinan ida-ne’e sura ba kotuk, konsulta populár ba dala XXIII ona entaun líder sira presiza hamutuk hodi kria estabilidade no halo dezenvolvimentu ba rai ida-ne’e.
“Ita-nia líder sira kria dezentendimentu mak nia impaktu ba ita-nia oan ho bei’oan sira, nune’e ha’u husu ita hamutuk hodi hatudu pás no estabilidade ba ita-nia jerasaun sira tuir mai,” nia dehan.
Tuir nia, Timor-Leste nia independénsia tinan 20 ona, ne’e presiza kria estabilidade ba rai ida-ne’e hodi bele lori naroman liu-liu ba dezenvolvimentu nasaun ida-ne’e.
Dezenvolvimentu tantu fíziku ka dezenvolvimentu ba rekuru umanu la’o neineik hela, maibé ida-ne’e la’ós kestaun tanba Timor-Leste foin ukun-an tinan 20.
“Ita kompara ho nasaun seluk ne’ebé mak ukun-an durante tinan atus ba atus maibé dezenvolvimentu seidauk la’o di’ak, ne’ebé ita Timor-Leste nia dezenvolvimentu la’o di’ak hela no iha balun mak seidauk la’o. Mezmu konflitu maibé ita haree dezenvolvimentu la’o maibé ita labele pesimista demais, presiza la’o di’akliu tanba ita atraza barak afinál ita iha osan, mina no ita iha rekursu umanu ne’ebé sufisiente,” nia hateten.
Hosi tempu ba tempu sempre temi liafuan pás no estabilidade, tanba nasaun ida sempre iha pás no estabilidade, liu-liu nasaun ne’ebé foin ukun-an hanesan ita Timor-Leste presiza iha pás no estabilidade.
Jornalista : Osória Marques
Editór : Cancio Ximenes
