DILI, 22 agostu 2022 (TATOLI)—Diresaun Nasionál Transporte no Terrestre (DNTT), tinan ne’e, sei prodús blanku karta kondusaun ba karreta no motorizada hamutuk 60.000 resin.
Xefe Departamentu Rejistu DNTT, Amándio do Rosário, hateten, daudaun ne’e DNTT seidauk iha blanku karta kondusaun orijinál tanba daudaun iha prosesu konkursu.
“Prosesu konkursu blanku ne’e sei ramata iha fulan ida-ne’e, ne’ebé outubru 2022 fiar katak blanku orijinál ba karreta no motór 60.000 resin ne’e iha ona,” Diretór informa ba Agência Tatoli, iha ninia knaar fatin, Balide, segunda ne’e.
Notísia relevante: DNTT rejista importasaun veíkulu 10.296 iha janeiru to’o jullu
Nia dehan, karreta no motorizada ne’ebé seidauk hetan blanku ne’e hahú hosi 2018 to’o 2022.
“Iha tinan 2019 to’o 2021 ne’e situasaun COVID-19, entaun ita foin prosesa fali iha tinan ne’e,” nia akresenta.
Durante ne’e DNTT fó blanku provizóriu ho durasaun fulan-neen to’o tinan ida.
Jornalista : Arminda Fonseca
Editora : Julia Chatarina
