DILI, 16 agostu 2022 (TATOLI)—Ministériu Transporte no Komunikasaun (MTK) liuhosi Diresaun Nasionál Transporte Terrestre (DNTT) rejista veíkulu hamutuk 10.296 kompostu hosi importasaun via fronteira 208 no via marrítima 10.088, hahú hosi janeiru to’o jullu 2022.
“Hosi ita-nia dadus importasaun ne’e nia reseita mak ba rejistu veíkulu hamutuk $980.342 no aprovasaun ba veíkulu importadu ne’e hamutuk $100.008,” Xefe Departamentu Rejistu DNTT, Amandio do Rosário, hateten ba Agência Tatoli, iha ninia knaar fatin, DNTT, Balide, tersa ne’e.
Notísia relevante: Governu altera dekretu-lei importasaun veíkulu asegura protesaun konsumidór no meiu ambiente
Importasaun veíkulu via fronteira 208 kompostu hosi karreta 153 no motorizada 55, enkuantu via marrítima 10.088 kompostu hosi karreta 2.355, motorizada 7.565 no trisiklu 168.
Karreta no motorizada ne’ebé rejistu ona iha DNTT hahú hosi tinan 2001 to’o dezembru 2021 hamutuk 232.012, kompostu karreta hamutuk 52.469 no motorizada 179.543.
Jornalista : Arminda Fonseca
Editora : Julia Chatarina
