VIQUEQUE, 22 agostu 2022 (TATOLI)—Eskola Ensinu Báziku Sentrál (EBC, sigla portugés) 28 novembru iha suku Afaloikai, postu Uatucarbau, munisípiu Viqueque daudaun ne’e presiza ema tau-matan ba eskola.
“Ami iha ne’e laiha guarda eskola no cleaner hodi tau-matan ba ami-nia eskola, durante ne’e ha’u maka sai guarda no ha’u maka dadeer-dadeer sai cleaner hodi hamoos fatin sira-ne’e hafoin hanorin tan estudante sira,” Diretór EBC 28 novembru hateten iha resintu eskola, iha suku Afaloikai, segunda ne’e.
Notísia relevante: Eskola Tékniku Vokasionál Kaloheda Viqueque menus fasilidade prátika
Diretór ne’e asume ona kargu diretór iha eskola ne’e durante tinan-10 resin.
“Ha’u husu Ministériu Edukasaun Juventude no Desportu (MEJD) bainhira maka bele rekruta guarda eskola no cleaner hodi tau-matan ba eskola,” nia akresenta.
Fundadór eskola ne’e haktuir, nia parte hato’o ona preokupasaun sira ba edukasaun munisípiu Viqueque maibé to’o agora seidauk iha resposta ruma.
Aleinde ne’e, eskola públika ne’e menus sala aula enkuantu estudante ho númeru boot.
“Ami iha ne’e iha sala neen, ami presiza tan sala neen hodi koloka estudante sira tanba menus sala maka tenke fahe oras dadeer no lorokraik. Ho ida-ne’e maka ami husu Ministériu Edukasaun atu tau-matan ba ami-nia eskola,” nia tenik.
Tuir dadus, totál estudante iha eskola ne’e hamutuk 298 ho totál profesór hamutuk 19.
Jornalista : Vitorino Lopes da Costa
Editora : Julia Chatarina
