DILI, 22 agostu 2022 (TATOLI)—Ministru Edukasaun Juventude no Desportu, Armindo Maia, lansa fatuk dahuluk konstrusaun Eskola Ensinu Sekundáriu Jerál (ESJ) 10 dezembru, Comoro ba edifísiu ida, sala aula tolu no laboratóriu ida ba faze dahuluk ho kustu hamutuk $108.265,95.
Tuir Ministru Armindo Maia, lansamentu fatuk dahuluk konstrusaun eskola ne’e nu’udar projetu komunitáriu, ho nune’e bazeia ba dadus eskola iha territóriu nasionál to’o dezembru 2022, kuaze eskola hamutuk 220 mak sei konklui konstrusaun liuhosi projetu komunitáriu no kapitál dezenvolvimentu.
“Ha’u husu ba mestre sira iha eskola ne’e inklui alunu no inan-aman sira atubele tau nafatin atensaun hodi kontribui nafatin prosesu konstrusaun foun eskola. Prosesu konstrusaun ne’e rasik sei hahú iha tempu badak,” Ministru hateten iha resintu eskola, Comoro, segunda ne’e.
Aleinde ne’e, iha mós eskola balun iha munisípiu Bobonaru ne’ebé to’o oras ne’e hasoru difikuldade boot tanba udan la fó fatin atu hahú prosesu.
“Espera bainhira situasaun normaliza hikas bele realiza ona serimónia lansamentu fatuk dahuluk iha eskola hirak ne’e no Ministériu Edukasaun rasik iha esperansa katak bainhira tinan ne’e ramata prosesu konstrusaun no reabilitasaun eskola sira iha territóriu nasionál bele atinje to’o eskola 230,” nia akresenta.
Notísia relevante: MEJD no ADN konkorda rezolve projetu komunitáriu
Iha biban hanesan, Diretór Servisu Edukasaun Munisípiu Dili, Carlito Soares, haktuir Eskola ESJ 10 dezembru nu’udar eskola ikus ne’ebé halo lansamentu hosi projetu 16 iha Dili, signifika seluk realiza ona.
Maski eskola 16 iha Dili hahú ona prosesu konstrusaun no reabilitasaun, maibé sei iha mós eskola 14 seluk maka sei iha prosesu atu realiza iha tinan 2023.
“Ha’u tenta hela atu rezolve eskola 12 seluk ne’ebé identifikadu hosi Ministériu Edukasaun Juventude no Desportu maka hanesan eskola Casnafar, Beduku no Taibesi mota ulun, ne’ebé iha tempu badak hanesan mós eskola 16 ne’ebé implementa ona programa,” nia tenik.
Nune’e, nia husu ba profesór sira hotu ne’ebé okupa edifísiu eskola sira atu buka koopera ho Governu liuhosi MEJD, autoridade lokál inklui autoridade seguransa hodi nune’e bele apoiu dezenvolvimentu di’ak liután ba edukasaun iha kapitál Dili inklui iha territóriu nasionál.
Konstrusaun no reabilitasaun edifísiu eskola sira ne’ebé realiza inklui iha territóriu nasionál atu responde planu dezenvolvimentu nasionál ne’ebé Governu hatuur hodi responde meta ba tinan 2030 oin mai.
Jornalista : Tomé Amado
Editora : Julia Chatarina
