DILI, 22 agostu 2022 (TATOLI)-Diretór Nasionál Orsamentu no Jestaun Finansa, Ministériu Saúde (MS), Miguel Maria, relata bazeia ba relatóriu ezekusaun orsamentu jerál Estadu (OJE) ne’ebé aloka ba Ministériu Saúde hodi ezekuta durante 2022 ne’e, konsege ezekuta ona pursentu 63.9 ka millaun $33-resin hosi totál orsamentu $52,181,675.00.
Ba tinan 2022, Parlamentu Nasionál (PN) aprova ona orsamentu ba Ministériu Saúde hamutuk $52,181,675.00.
Tuir dadus to’o loron 22 agostu 2022 ne’e konsege ezekuta ona millaun $ 33-resin ka pursentu 63.9, fahe ba kompromisu sira ho totál $2,313,084.56, obrigasaun sira $4,319,006.52, atuál $29,015,383.41 no saldu $16, 534,200.51.
Notísia Relevante :Ministériu Saúde prioritiza saúde públika iha OJE 2022
“Orsamentu ne’ebé mak prevee ba Ministériu Saúde hamutuk $52.181.675.00 entaun hosi janeiru to’o agostu ita ezekuta ona hamutuk millaun $ 33,3 ka 63.9%,” Diretór Nasionál ne’e, relata ba TATOLI, iha ninia servisu fatin, Caicoli Dili, segunda ne’e.
Nia dehan hosi totál ezekusaun fahe ba kategoria saláriu vensimentu, bens servisu, kapitál menór, kapitál dezenvolvimentu, no transferénsia públika.
Tuir nia prosesu ezekusaun orsamentu ba tinan 2022 iha Ministériu Saúde la’o ho di’ak, maibé iha item tranferénsia públika liliu tranferénsia pasiente ba rai-liur maka ninia orsamentu laiha balansu ho númeru tranferénsia.
Tanba ne’e maka daudaun ne’e, Ministériu Saúde prepara ona atu haruka ba Ministériu Finansa hodi foti osan hosi fundu kontijénsia nian ho montante millaun $6 nune’e bele haruka pasiente sira bá halo tratamentu sáude iha rai-liur.
Ba tinan fiskál 2022, Ministériu Saúde prevee orsamentu ba programa tolu, sub programa 19, atividade 69 ne’ebé alokadu ba programa governansaun di’ak no institusionál prevee $ 8,548,068 programa saúde alokadu $43,563,487 no igualidade jenéru no inkluzaun sosiál prevee $ 2,000.
Notísia Relevante :EUA apoia fundu adisionál $600,000 ba MS hodi reforsa sistema saúde iha TL
Jornalista : Felicidade Ximenes
Editór : Agapito dos Santos
