VIQUEQUE, 23 agostu 2022 (TATOLI)--Abitante suku Afaloikai, postu administrativu, munisípiu Viqueque husu ba Ministériu Justisa (MJ) atu koloka ekipa trata dokumentu iha suku, nune’e abitante sira fasil atu asesu.
“Komunidade hosi suku Afaloikai hakakrak husu ba Ministériu Justisa atu koloka ekipa notariadu sira hodi mai trata komunidade sira-nia sertidaun nasimentu no billete identidade tanba Governu implementa kritériu ba idozu sira, bainhira simu subsídiu tenke ho dokumentu hirak ne’e, maibé sai difikuldade ba ferik no katuas sira ba trata dokumentu iha munisípiu. Ho ida-ne’e ami husu ba ministériu se bele mai iha suku hodi trata komunidade nia dokumentu,” Abitante suku Afaloikai, Amaro de Jesus, hateten ba Agência Tatoli, iha suku Afaloikai, tersa ne’e.
Notísia relevante: Rejistu Sivil Viqueque menus orsamentu atu atende dokumentu iha baze
Nia rekomenda ministériu kompetente atu mobiliza ekipa mai suku hodi halo atendimentu ba komunidade, tanba antes ne’e Adiministradór Uatucarbau hato’o ona iha munisípiu iha loron 30 dezembru 2021, hodi husu notariadu mai halo atendimentu iha suku maibé to’o agora seidauk mai.
“Daudaun ne’e liña eletrisidade instala hotu ona iha suku Afaloikai nune’e Administradór nafatin tenta mininistériu kompetente hodi mai prodús abitante sira-nia dokumentu,” nia akresenta.
Iha fatin hanesan, Xefe Afaloikai, Agustinho Pinto, hateten, idozu difisil atu ba trata dokumentu iha munisípiu.
Aleinde ne’e, Banku Nasionál Komersiál Timor-Leste (BNCTL) apela ona ba benefisiáriu, bainhira atu simu subsídiu tenke aprezenta sertidaun nasimentu no billete identidade.
“Ha’u nu’udar autoridade hakarak husu ministériu kompetente se bele mai suku hodi trata dokumentu. Idozu sira maka ba trata sira-nia dokumentu ba munisípiu ita hulan mate isin mak fila, tanba dalan liga mai ami-nia suku ho kondisaun a’at,” nia hato’o.
Antes ne’e, Diretór Servisu Rejistu Sivil Munisípiu Viqueque, Anaceto Moreira, hateten, nia parte planeia ona atu halo atendimentu inan-aman sira suku, maibé iha difikuldade iha orsamentu ba suku, transporte no ekipamentu, tanba ne’e seidauk bele implementa.
Jornalista : Vitorino Lopes da Costa
Editora : Julia Chatarina
