ADTL husu ba ema ho defisiénsia iha Viqueque asesu ba edukasaun
VIQUEQUE, 23 agostu 2022 (TATOLI)--Asosiasaun Defisiénsia Timor-Leste (ADTL) husu ba ema ho defisiénsia hosi munisípiu Viqueque atu asesu ba edukasaun ne’ebé maka asosiasaun loke iha Dili hodi hasa’e koñesimentu.
“ADTL iha ninia programa edukasaun ba ema defisiénsia nian, nune’e ha’u-nia maluk defisiénsia seidauk ramata eskola karik bele bá ADTL tanba loke ona eduksaun inklusivu tantu defisiénsia ho tipu saida de’it ADTL sei atende,” Reprezentante ADTL, Bruno Soares Saldanha hateten ba Agência Tatoli iha salaun administrasaun munisípiu Viqueque, kuarta ne’e.
ADTL mós fó voluntáriu ba ema ho defisiénsia sira ne’ebé maka hakarak apreende no hasa’e koñesimentu. Daudaun ne’e ADTL iha ninia eskola rasik maibé eskola foin iha Pré-sekundáriu.
“Maibé ha’u fiar katak tinan oin sei loke tan eskola sekundáriu ba ema ho difisiénsia iha Timor Leste,” nia esperansa.
Notísia relevante: ADTL husu Governu aselera estatutu Konsellu Nasionál direitu ba EhD
Nune’e, nia dehan, ADTL sai sumbriña ba organizasaun defisiénsia iha Timor Leste hamutuk 21 ne’ebé liga liu ba asuntu difisiénsia nian.
Iha fatin seluk, Ofisiál Rais Hadomi Timor-oan (RHTO) munisípiu Viqueque, Natalino Pinto, haktuir ema ho difisiénsia hosi munisípiu Viqueque kuaze ba barak mak seidauk asesu ba edukasaun formál sira.
“Dadus ema ho difisiénsia iha munisípiu Viqueque ne’ebé asesu ona ba eduksaun ne’e iha oituan liu kuaze 5% maka daudaun asesu hela ba edukasaun. Balun asesu tiha sira lakoi eskola fali,” nia tenik.
Tuir dadús difisiénsia hosi munisípiu Viqueque totál hamutuk 3.416 hosi númenru ne’e 5% de’it maka asesu ba edukasaun.
Jornalista : Vitorino Lopes da Costa
Editora : Julia Chatarina
