BOBONARO, 23 Agostu 2022 (TATOLI) -Autoridade Munisípiu Bobonaro (AMB) husu ba komunidade sira atu dada sa’e bandeira Repúblika Demokratika Timor-Leste (RDTL) iha idak-idak nia uma-oin, hodi komemora loron konsulta popular 30 agostu ba dala-XXIII.
Prezidente Autoridade Munisípiu Bobonaro, Ernesto de Oliveira Barreto apela ida-ne’e tanba iha tinan kotuk selebrasaun loron proklamasaun independénsia 28 novembru no foin lalais iha 20 maiu ne’e komunidade iha munisípiu Bobonaro barak mak laiha konsiénsia hodi hasa’e sa’e Bandeira RDTL iha uma oin.
Notísia relevante: Governu aloka rihun $100 komemora loron Konsulta Populár ba dala-XXIII
“Ha’u husu uma-kain idak-idak, bele hasae ona Bandeira iha uma oin hodi selebra ita-nia loron importante ne’e,” nia informa ba Jornalista sira, iha kna’ar-fatin, Maliana, tersa ne’e.
Tuir nia, povu hotu tenke respeita loron konsulta populár hanesan loron importante ba jerasaun foun tanba iha loron 30 agostu mak determina futuru nasaun Timor-Leste sai nasaun independente iha mundu nia leet ho ninia soberania rasik.
VIII Governu hili loron konsulta populár ba dala-XXIII ho tema “Ho espíritu kosulta populár 30 agostu 1999, mai ita hametin pás no estabilidade ba dezenvolvimentu iha ita-nia rai Timor-Leste”.
“Ita tenke iha sentidu nasionalizmu no patriotizmu ne’ebé forte, tanba ukun-aan ida-ne’e la’os ema tau iha bandeza mak fó mai ita, maibá ita sosa liuhosi maluk sira-ne’ebé fakar raan no lekar ruin iha fatin-fatim, até agora seidauk hetan, ne’e duni komunidade hotu tenke hasa’e Bandeira tamba loron ne’e mak ita hotu deside ba dalan ukun-aan,” nia apela.
Autoridade munisípiu sei hasai sirkulár ida hodi orienta administradór postu administrativu neen iha munisípiu ne’e atu aviza tama sai suku hotu, nune’e konsiensializa komunidade sira hasa’e Bandeira RDTL hodi selebra loron importantes ne’e.
Munisípiu Bobonaro iha postu administrativu neen mak hanesan; Atabae, Balibo, Cailaco, Maliana, Bobonaro no Lolotoe, ho totál aldeia 193 no suku 50 ne’ebé bazea ba sensu uma-kain totál populasaun 180.502 hosi uma-kain 28.810.
Jornalista: Sérgio da Cruz
Editór: Evaristo Soares Martins
