DILI, 23 agostu 2022 (TATOLI)–Estudante timor-oan na’in-neen ne’ebé hetan bolsa estudu hodi ba estuda iha Universidade Politeknik Penerbangan (Poltekbang) Surabaya, Indonézia ho diploma III, simu ona graduasaun ba dahuluk, iha sábadu (20/08).
Bolseiru sira hetan bolsa estudu liuhosi programa Aeroportu no Navegasaun Aérea Timor-Leste, Empreza Públika (ANATL, E.P) no finansia hosi Fundu Dezenvolvimentu Kapitál Umanu (FDCH, sigla portugés).
“Hosi númeru graduadu na’in-288 ne’ebé gradua iha loron 20 agostu iha Poltekbang Surabaya ne’e, inklui mós foin-sa’e timor-oan na’in-ualu ne’ebé mak simu mós graduasaun. Estudante timor-oan hirak ne’e, na’in-neen nu’udar benefisiáriu ba programa bolsa estudu ne’ebé organiza hosi ANATL no finansia hosi FDCH no na’in-rua seluk finansia hosi família (inan-aman),” refere nota ne’ebé Agência Tatoli asesu, tersa ne’e.
Bolseiru graduadu ne’e hahú sira-nia estudu iha Poltekbang Surabaya iha tinan 2019 no sira nu’udar rekursu primeiru ne’ebé Governu liuhosi FDCH investe hodi prepara servisu iha área aviasaun iha ANATL, E.P, ho área estudu hanesan air traffic control (ATC) iha na’in-rua, airport electricity iha na’in-rua, no airport engineering iha na’in-rua.
Akordu tékniku ne’ebé estabelese hosi FDCH, ANATL, E.P no Poltekbang nu’udar konkordánsia atu kontinua nafatin loke dalan ba timor-oan sira hodi ba hala’o estudu liuhosi bolsa estudu.
Nune’e mós iha tinan ne’e, Poltekbang sei simu timor-oan na’in-neen ne’ebé foin lalais admitidu iha teste hodi hala’o estudu iha área hanesan jestaun ba aeroportu, bombeiru aeroportu no air navigation engineering.
Notísia relevante: Bolseiru neen sei hala’o estudu iha Poltekbang Surabaya
Bainhira bolseiru graduadu sira fila mai sei servisu iha ANATL. EP hodi kontribui filafali matenek sira ne’ebé hetan tuir ida-idak ninia área iha instituisaun ensinu superiór ne’e.
Ba futuru FDCH no ANATL kontinua tau importánsia ba dezenvolvimentu rekursu umanu iha área aviasaun hodi bele responde ba nesesidade servisu sira aeroportu Timor-Leste.
Serimónia graduasaun ba graduadu na’in-288 iha Poltekbang Surabaya ne’e partisipa hosi Diretór Ezekutivu FDCH Cristóvão dos Reis, Prezidente Konsellu Administrasaun ANATL, E.P José Trindade da Cruz, akompaña hos Vogál sira inklui Koordenadora GAFRHI FDCH no Xefe DEMEREP GAGESI FDCH.
Hafoin ramata serimónia, parte rua asina nota entendimentu hodi halo nafatin kooperasaun atu kontinua haruka foin-sa’e timor-oan sira ba hala’o estudu liuhosi programa bolsa estudu.
Jornalista : Tomé Amado
Editora : Julia Chatarina
