DILI, 23 agostu 2022 (TATOLI)—Reprezenta Família, Pe. Juvito do Rego Araújo, informa familia konkorda halo autopsia ba matébian Pe. Abito José Brites Casemiro nia mate-isin, nune’e bele hatene kronolójia hosi akontesimentu ne’e.
Notísia Relevante: Asidente iha Dare, Maromak bolu hikas Pe. Abito José Brito
“Asidente ne’e ami la hatene. Tanba, hatene katak nia halai neineik no iha sasin ida-ne’ebé moris hela no lahetan buat ida iha nia an. Nia mós mai hamutuk iha ne’e, ne’ebé ami prefere katak halo autopsia atu bele hatene loloos. Tanba, Amu Bispu mós oras ne’e halo hela viájen ba Roma atu ba tuir konsistóriu hanesan kardeál iha 27 agostu, tanba ne’e amu Bispu laiha. Maibé membru kuria nian iha ne’e, entaun ami hotu hola desizaun katak di’akliu halo autopsia atu bele hatene,” Padre Juvito do Rego hateten ba jornalista sira, iha Mortuáriu Hospitál Nasionál Guido Valadares (HNGV), Bidau, Dili, tersa ne’e.
Hosi ne’e, hori kalan telefone kedas ba Polisia Sientifika Investigasaun Kriminál (PSIK) no Diretór haruka kedas membru lubuk ida mai iha Hospitál hodi haree kondisaun, ko’alia ho sasin ne’ebé iha no ba kedas fatin akontesimentu halo kedas filmajen.
“Ohin dadeersan ne’e, tuir prosedimentu tenke hein hosi Ministériu Públiku katak halo proposta hosi PSIK ba Ministériu Públiku, hosi ne’e Ministériu Públiku hatun ona despozisaun mai mak sira mai, agora halo hela autopsia seidauk ramata,” nia dehan.
Kona-ba deskonfia ema ruma mak halo asaun ba asidente ne’e, Amu Juvito hatán, deskonfia ba asidente ne’e sempre iha maibé labele kaer ba deskonfiansa, tanba ne’e presiza ba autopsia atu hamoos duvida sira hotu tanba autopsia mak fó sai lolos, pankada ne’ebé Pe. Abito José monu duni mak halo pankada ne’e ka no ema ruma mak halo pankada, ida ne’e autopsia mak revela mai atu hatene.
“Tanba ne’e, ita hein de’it autopsia no ita labele halo espekulasaun, lae orsida ita dun matak ema mós laloos ida. Tanba ne’e, amu-lulik ida no submete ona ba autopsia, ita hein rezultadu autopsia nian depois mak ita bele hola konkluzasaun,” nia dehan.
Maske nune’e, hafoin finaliza autopsia mak matebian Amu Abito José Brites Casemiro sei lori ba Semináriu Maiór, tanba nia hakna’ar an hela iha iha ne’ebá tanba Amu Reitór hosi simináriu sira prepara ona fatin, tanba ne’e orsida sei lori matebian ba semináriu maiór iha Fatumeta hodi ba deskansa kalan ida iha ne’ebá.
“Ha’u hanoin katak tanba ho kondisaun ida hanesan ne’e, dezde hori kalan kedas raan ne’e sai hela de’it hosi nia tilun, tanba ne’e rezolve hori kalan hatama kedas ba fatin seguru no agora iha hela PSIK nia liman hodi halo autopsia. Autopsia ramata orsida sei lori ba semináriu toba kalan ida, depois aban tenke foti desizaun ba haloot,” nia hateten.
Tuir informasaun ne’ebé Agência Tatoli asesu, hafoin halo autopsia ramata, iha lorokraik ne’e mate-isin Pe. Abito José Brites Casemiro lori ona ba Semináriu Maiór Fatumeta, no tuir planu sei hatuur kalan ida iha ne’ebá mak hafoin deside atu haloot.
Pe. Juvito hateten, akontesimentu ne’e hanesan akontesimentu ida-ne’ebé dezesperadu tanba nia simu telefone iha tuku 20h00 ka besik tuku 21h00 kalan, nune’e nia telefone ba amu Paulos no sira-rua ba kedas iha Hospitál maibé to’o ne’e Amu Abito José iis laiha ona.
Nia informa, bainhira matébian lori ba fatin emerjénsia mak médiku sira hamoos amu-nia oin no hasai kapasete ne’ebé monu iha hela ulun ho raan nakonu, depois hamoos raan no sira komesa kuiñese katak ne’e amu-lulik ida.
“Entaun, sira telefone ba Dioseze, Amu Paulos ami na’in-rua mai kedas to’o iha ne’e, maibé bainhira to’o mai iha ne’e nia iis la iha ona. Hosi ne’e ami sai ba telefone amu-lulik sira, amu nia Pãe, Mãe no bin, alin sira mós iha ne’e hela hotu. Ne’ebé hotu-hotu mai kedas hori-kalan no hotu-hotu akompaña hela iha ne’e,” nia dehan.
Amu-lulik foun, simples no haraik an
Tuir nia, Amu Abito José Brites Casemiro ne’e nu’udar au-lulik foun no amu-lulik modelu di’ak, simples no haraik an no disponivél ba tempu hotu.
“Nia sai diakno hela iha Motael. Molok seidauk ordena nia iha Parokia Bedois servisu hamutuk ho Pe. Alberty Morango iha SEARA, depois ordena nia ba iha Motael, hanesan diaknu to’o nia ordenasaun iha Gleno. Depois ordenasaun nia fila-fali mai hodi servisu nafatin iha ne’ebá (Motael). Kuandu servisu ona iha Motael muda nia ba semináriu, tanba amu ida iha ne’ebá tenke sai, entaun muda nia ba iha semináriu hanesan ekónomo iha semináriu,” Amu Jovito haktuir.
Maske nune’e, bainhira atu muda Amu Abito José Brites Casemiro ba semináriu nu’udar ekónomo, Amu Bispu halo retiru ho nia atu transfere ba semináriu.
“Foin daudaun Amu Bispu iha retiru ikus, amu Bispu ko’alia ona ho nia atu transfere nia mai iha dioseze atu sai ekónomo, tanba ekónomo Amu Ivo atu ba halo kontinuasaun estudu, tanba ne’e atu muda nia (Amo Abito) ba ne’ebá. Maibé seidauk muda, prontu Maromak hakarak buat ne’e. Planu dioseze nia mak ida-ne’e maibé Maromak hanoin buat seluk ba nia,” nia hateten.
Tuir planu Pe. Abito José Brites Casemiro sei haloot iha semitériu Amu lulik nian iha Ailok Laran, tanba Amu lubuk ida haloot ona iha ne’ebá mak hanesan Amu Bispu Ricardo, Amo Diometriu, Amo Monteiro, Amo Arnaldo, Amo Lorenço no Amo Rafael.
Entretantu, Amo Abito José Brites Casimiro hetan ordenasaun tinan haat (4) liubá iha 27 marsu, iha munisípiu Ermera-Gleno.
Jornalista : Nelia Fernandes
Editor : Cancio Ximenes
