DILI, 23 agostu 2022 (TATOLI)—Vise Bankada Frente Revolucionária de Timor-Leste Independente (FRETILIN) iha Parlamentu Nasionál (PN), Deputadu Antoninho Bianco, apela ba joven timoroan hakribit violénsia hodi kria pás no estabilidade iha rai-laran.
Notísia Relevante: TDD aplika TIR ba arguidu na’in-sia ba kazu tuda kanek membru PSHT
Antoninho Bianco, hato’o mensajen ne’e ba Agência TATOLI, iha Parlamentu Nasionál, tersa ne’e, relasiona ho akontesimentu iha loron hirak liu ba hafoin menbru organizasaun Persaudaran Setia Hati Terate (PSHT), balun hafoin graduasaun ramata fila iha dalan hetan asaltu hosi grupu joven balun ne’ebé rezulta membru PSHT balun hetan kanek grave.
“Ema barak kria estabilidade maibé iha ema ida rua mak provoka situasaun tanba ema balun iha tentativa lakohi iha unidade amizade entre arte marsiál sira. Tanba ne’e, ha’u hanoin apelu labale disemina entre arte marsiál sira ida-idak organiza nia an, mesak timoroan de’it kria pás no estabilidade,” nia hateten.
Tanba, nia dehan, membru arte marsiál hirak ne’e mesak timoroan de’it, nune’e dedika kna’ar iha organizasaun oioin hanesan arte marsiál ne’e, nu’udar arte ida hodi promove timoroan sira-nia unidade
“Ba ha’u hanesan reprezentante povu mesak povu nia oan mak reprezenta iha PN husu liu-hosi atividade arte sira-ne’e, hodi hametin unidade entre organizasaun sira-ne’ebé ramu bara-barak, ho ida ne’e mak ita hatudu unidade, asaun no progresu ba Timor-Leste tenke ba oin,” nia dehan.
Vise Bankada Conselho Nacional de Reconstrução de Timor (CNRT), Deputadu, Patrocínio Fernandes, apela ba joven timoroan kria pás no estabilidade hodi kontribui ba dezenvolvimentu nasionál.
“Ita hakarak dezenvolve ita-nia rai presiza estabilidade no pás, presiza ema hotu rona malu. Joven sira liu-liu sira-ne’ebé envolve iha arte marsiál,” nia husu.
Nune’e, joven sira partisipa no envolve an iha organizasaun arte marsiál hodi forma mós sidadania di’ak liután ba mentalidade depois bele kontribui ba nasaun.
Deputadu hosi bankada opozisaun ne’e nafatin husu entidade hotu-hotu liu-liu Governu hanesan polísia ho sira seluk presiza mós halo prevensaun ba konflitu sira inklui responsavél grupu arte marsiál sira.
“Ita hotu hatene katak laiha grupu arte marsiál ida mak nia atu eduka buat ne’ebé ladi’ak maibé responsavél sira tenke hatene katak bainhira ita akomoda ema barak ona mai ho karáter oioin nune’e presiza kontrola ho di’ak iha regra no dixiplina, pelumenus organizasaun sira kontribui ba pás no estabilidade. Nune’e ba membru arte marsiál hotu-hotu tau konsiénsia oinsá kontribui ba pás,” nia hateten.
Notísia Relevante: Gradua membru na’in-8.529, Governu husu PSHT kontribui ba pás-estabilidade
Jornalista : Nelson de Sousa
Editór : Cancio Ximenes
