STAE sosializa rekolla dadus defisiénsia ba xefe suku sira iha Viqueque
VIQUEQUE, 23 agostu 2022 (TATOLI)–Sekretáriu Tékniku Administrasaun Eleitorál (STAE), tersa ne’e, sosializa prosesu rekolla dadus defisiénsia ba xefe suku sira iha munisípiu Viqueque.
“Ohin ami mai halo sosializasaun prosesu rekolla dadus difisiénsia ba xefe suku sira iha munisípiu Viqueque hodi asesu ba eleisaun nian,” Reprezentante Diretór Jerál STAE, Carceles Ximenes, hateten iha salaun munisípiu.
Prosesu rejistu defisiénsia ba tipu sira hanesan defisiénsia matan, tilun, ain no seluk tan no hosi dadus sira-ne’e xefe suku sira rekolla hotu hafoin STAE ba prodús kartaun eleitóral.
Tipu dadus difisiénsia sira-ne’e ami ba halo atendimentu hodi prodús sira-nia kartaun eleitorál. Liu-liu maluk defisiénsia sira ne’ebé seidauk iha eleitóral atu eleisaun sira tuir mai sira bele partisipa.
“Daudaun ne’e ami foin halo koordenasaun ho xefe suku sira. Hafoin xefe suku sira relata proposta ba STAE hodi trasa planu ba suku,” nia akresenta.
Notísia relevante: Introdús sistema biométriku, STAE sei konsulta ho TIC-Timor-Leste
Iha fatin hanesan, xefe suku Ossorua, Eduardo da Silva Freitas, hateten, planu rekolla dadus ema ho defisiénsia iha suku tanba dadus maka sai fundamentu ba prosesu resensiamentu eleitóral.
“Ami seidauk submete adus hosi suku Ossorua ba STAE. Nune’e ha’u sei koordena ho ha’u-nia xefe aldeia sira,” nia dehan.
Bazeia ba dadus hosi Asosiasaun Defisiénsia Timor Leste (ADTL) tinan 2015 rejista ema ho defisiénsia hosi munisípiu Viqueque hamutuk 3.416.
Atividade ne’e partisipa hosi hosi xefe suku no reprezenta xefe suku sira iha munisípiu Viqueque.
Jornalista : Vitorino Lopes da Costa
Editora : Julia Chatarina
