DILI, 24 agostu 2022 (TATOLI)– Sekretáriu Jerál Federasaun Futeból Timor-Leste (FFTL), Gregorio Correia, hateten hato’o ona karta ba Liga Futeból Timor-Leste, atu konvoka enkontru hodi realiza, maibé laiha resposta ne’ebé klaru hodi foti desizaun ruma nune’e bele realiza liga époka ne’e.
“Ami hakerek karta ona ba LFTL hodi husu atu ami halo reuniaun, maibé laiha resposta ida ba ami. Nune’e ohin dadeer ha’u rasik haruka Diretór tékniku FFTL kontaktu ba sira balun iha LFTL, maibé sira dehan seidauk simu orientasaun no liafuan ruma hosi sira nia superiór,” dehan Sekretáriu Jerál ne’e ba Jornalista-sira iha edifisiu FFTL Dili, kuarta ne’e.
Notísia relevante: SEJD-FFTL sei aloka $400.000 realiza liga époka 2022
Nia husu ba LFTL tenke koopera hodi ko’alia oinsá bele realiza liga iha tempu besik tanba parte FFTL no Sekretáriu Estadu Juventude no Desportu (SEJD) no prontu ona tau osan hamutuk $400.000.
Tanba, FFTL no SEJD iha ona pozisaun klaru atu realiza liga maibé to’o agora laiha resposta hosi LFTL atu tau osan hira.
“Ami prontu ona, agora uma-na’in atu tau hira, ami hein hela atu ko’alia sai sira tau hira ne’e liga bele la’o ona. Ha’u hakarak hateten de’it katak se LFTL laiha vontade atu responde ami nia karta mak ami sei halo karta konvite hato’o ba klube sira para ko’alia hodi buka alternativa nune’e bele hala’o liga,” nia dehan.
Bainhira hein de’it LFTL liuliu superiór seidauk fó resposta mak liga sei labele la’o, ho nune’e mak FFTL sei foti desizaun hodi organiza liga fuetbóliha tempu besik.
“Ami tenke foti desizaun ruma tanba públiku sempre fó kulpa mai ami FFTL, dehan ami mak labele rezolve liga, maibé iha Timor-Leste ne’e ita iha orgaun liga, se buat hotu ami de’it ami bele hala’o. Ita konsidera malu mak bolu malu atu ko’alia haruka karta maibé laiha resposta ita atu halo oinsá tan, ikus ami mak hetan fali krítiku maka’as hosi públiku,” nia relata.
Nune’e, FFTL sei fó tan tempu semana ida ba LFTL hodi resposta karta ne’ebé haruka bá atu órgaun futeból sira bele tuur hamutuk oinsá atu bele hahú liga futeból ne’e,
Ho asuntu ne’e, Agência TATOLI tenta konfirma ho superiór LFTL nian hodi fó resposta, maibé sei okupadu ho servisu balun no sei fó resposta iha tempu besik.
Notísia relevante: LFTL preparadu realiza liga futeból époka 2022
Jornalista: Hortencio Sanchez
Editór : Florencio Miranda Ximenes
