Governu aprova kriasaun misaun apoiu prosesu resensiamentu eleitorál Guiné-Bissau
DILI, 24 agostu 2022 (TATOLI)–Governu liuhosi reuniaun Konsellu Ministru (KM) aprova projetu dekretu Governu ne’ebé aprezenta hosi Ministru Administrasaun Estatál (MAE), Miguel Pereira de Carvalho, ba kriasaun Misaun Apoiu ba Prosesu Resenseamentu Eleitorál Guiné-Bissau (MAPRE-GB ) tinan 2022, ba eleisaun ne’ebé prevee ba loron tuir mai 18 dezembru.
“Kriasaun MAPRE-GB 2022 ne’e tuir pedidu atu apoiu hodi organiza no realiza resenseamentu eleitorál ne’ebé Guiné-Bissau husu hodi rekoñese kontributu importante hosi misaun tolu timor-oan nian hodi apoia ba prosesu eleitorál Guiné-Bissau, ne’ebé estabelese tiha ona iha tinan 2013, 2014 no 2018, hodi bele hala’o eleisaun livre no justu iha país ne’ebá,” Ministru Prezidénsia Konsellu Ministru interinu, Rui Augusto Gomes, relata hafoin reuniaun ezekutivu, iha Palásiu Governu, kuarta ne’e.
Notísia relevante: Vise-MAE nomeadu sai reprezentante espesiál ba prosesu resensiamentu eleitorál Guiné-Bisau
AMAPRE-GB 2022 sei fó asisténsia téknika no promove asaun formasaun no kapasitasaun rekursu umanu ba órgaun administrasaun eleitorál Guiné-Bissau nian no atu promove ekipamentu teknolójika hodi halo resenseamentu eleitorál.
Enkuantu, orsamentu ne’ebé Governu apoia ba Guiné-Bissau hamutuk millaun $1, orsamentu ne’e inklui ona misaun ekipa dahuluk nian ne’ebé ba tiha ona, lideradu Vise-Ministru Administrasaun Eleitorál, Lino Torezão, ho orsamentu restu sei hela $900.000 hodi apoia ekipamentu hodi halo resensiamentu foun no deslokasaun ekipa nian.
Jornalista : Antónia Gusmão
Editora : Julia Chatarina
