Horta kondekora medalla méritu ba Eis-Jenerál Hendropriyono tanba proposta hosi Falur

DILI, 24 agostu 2022 (TATOLI)—Prezidente Repúblika (PR), Jose Ramos Horta, hateten iha komemorasaun loron FALINTIL ba dala-47 nia-parte kondekora Eis-Jenerál Reformadu Indonézia, Abdullah Makhmud Hentropriyono, tanba proposta ne’e hosi Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek.

Notísia Relevante: PR Horta sei kondekora jenerál no eis-jenerál hosi estranjeiru

“Ita-boot sira di’akliu ba Quartel F-FDTL husu ba boot sira iha ne’eba hanesan Tenente Jenerál, Falur Rate Laek, fó esplikasaun tanba proposta ne’e la’ós hau mak mehi no halo maibé proposta ne’e mai hosi Xefe Estadu Maiór Jenerál F-FDTL hodi kondekora ofisiál na’in-haat Almirante Portugál nian, Xefe Estadu Maiór Jenerál Forsa Armada Indonézia no Komandante Xefe Austrália ho Eis-Jenerál Indonézia, Hendropriyno,” PR Horta hateten ba jornalista sira iha edifísiu IADE, Mandarin, kuarta ne’e.

Xefe Estadu hato’o ida ne’e relasiona ho lamentasaun hosi Organizasaun sosiedade sivíl hitu hanesan Asosiasaun HAK, Asosiasaun Vítima Konflitu Polítiku 74-99, Asosiasaun CHEGA ba Ita, Lao Hamutuk, Asosiasaun Halibur Defisíensia Matan iha Timor-Leste, ba razaun konsiderasaun hosi PR nian kondekora Eis-Jenerál Indonézia ne’e.

“Proposta mai hosi sira (Tenente Jenerál Falur) no hau kolabora ho instituisaun sira forsa armada nian. Purtantu, agora sira mak bele hatene klaru ida-idak ho nia kurríkúlu mai razaun ruma kle’an ne’ebé imi (jornalista) sira ba ko’alia ho Falur esplika di’akliu,” nia hateten.

Kondekorasaun ne’e, Xefe Estadu ne’e dehan, nia-parte tane de’it Xefe Estadu Maiór Jenerál F-FDTL, Tenente Jenerál Falur Rate Laek nia desizaun tanba rekomendasaun mai hosi Tenente Jenerál.

Biografia Hendropriyono

Abdullah Makhmud Hendropriyono moris iha Yogyakarta miha 07 maiu 1945. Hafoin akaba eskola sekundária, nia hatutan nia estudu iha Akademi Militer Nasional iha Magelang-Jawah Tengah no akaba iha 1967.

Hendropriyono hahú nia karreira hanesan Komandan Peleton ho diviza ‘Letnan Dua Infanteri’ iha Komando Pasukan Sandi Yudha (Kopassandha), agora troka naran sai Komando Pasukan Khusus (Kopassus) TNI AD.

Nia karreira sa’e beibeik. Bainhira assume kna’ar hanesan Danrem 043/Garuda Hitam, Hendropriyono susesu asegura akontesimentu Talangsari 1989 iha Lampung.

Aleinde ne’e, nia mós envolve iha Gerakan Operasi Militer (GOM) VI, Operasi Sapu Bersih III, no Operasi Seroja iha Timor-Timur (agora Timor-Leste).

Ninia karreira aas liu, nia hetan fiar hanesan Panglima Kodam Brawijaya. Antes reforma, nia hetan fiar sai hanesan Komandan Pendidikan dan Pelathian (Kodiklat) TNI AD.

Aleinde iha kapasidade iha funu, Hendropriyono iha kapasidade iha área intelijen. Nia servisu iha área intelijen kuaze tinan sia (9) Kompañia terrestre (satuan Angkatan Darat). Hafoin reforma hosi TNI  (Tentara Nasional Indonesia), nia kaer kargu hanesan Kepala Badan Intelijen Negara (BIN).

Notísia Relevante: Hetan medalla méritu, Jenerál Andika agradese ba Estadu Timor-Leste

Jornalista : Nelson de Sousa

Editór      : Cancio Ximenes