MEJD kapasita dirijente ensinu báziku prienxe kaderneta foun
DILI, 24 agostu 2022 (TATOLI)–Dirijente eskola ensinu báziku sira iha munisípiu Dili, Aileu, Viqueque, Liquiçá no Ermera hetan kapasitasaun atu reforsa abilidade atu prenxe kaderneta eskolár foun ne’ebé Ministériu Edukasaun Juventude no Desportu (MEJD) liuhosi Unidade Kurríkulu Nasionál (UKN) distribui ona.
Xefe Departamentu UKN, Edia Monteiro, hateten, kaderneta eskolár ne’ebé maka foin prodús ne’e, ninia formatu foun maibé kurríkulu no sistema avaliasaun mak la muda.
“Ami hosi Gabinete Avaliasaun Dezenvolvimentu Kurrikulár iha hanoin ida molok atu fahe kaderneta ne’e ba eskola sira ami tenke halo uluk formasaun, ne’ebé la’o ona iha eskola sira iha munisípiu lima,” Xefe Departamentu hateten iha edifísiu UKN, Vila Verde, kuarta ne’e.
Notísia relevante: MEJD sei introdús kaderneta eskolár foun ba nível ensinu báziku
Formasaun ne’e rasik realiza ba dirijente eskola sira hanesan diretór no adjuntu, atu oinsá sira bele hatene uluk prienxe kaderneta eskolár foun ne’e, hafoin sira sei hatutan fali formasaun ba profesór sira, tanba kaderneta eskolár ne’e nu’udar instrumentu administrativa ne’ebé sei prienxe dezempeñu estudante sira-nia durante iha prosesu aprendizajen nian laran bazeia ba kurríkulu.
“UKN laiha ligasaun direta ho profesór sira maibé importante liu ho diretiva sira, hafoin maka bele kontinua ba profesór sira, tanba unidade hatene profesór sira iha grupu traballu entaun sira bele habelar informasaun ba malu kona-ba oinsá atu prienxe kaderneta ne’e,” nia akresenta.
Entre munisípiu lima ne’ebé hetan ona formasaun ne’e, Viqueque no Dili mak sei iha prosesu kontinuaun tanba Viqueque foin maka hetan formasaun maibe seidauk hetan distribuisaun kaderneta eskolár tanba iha difikuldade ho transporte, enkuantu iha Dili sei falta ensinu báziku Dar-Lau maka seidauk hetan formasaun tanba eskola sei iha hela feriadu, maibe Munisípiu haat seluk bainhira formasaun ramata mak sei hetan kedan distribuisaun kaderneta eskolár.
Kaderneta eskolár ne’e rasik MEJD prodús ba de’it estudante sira iha eskola ensinu báziku siklu 1,2 iha territóriu nasionál no kaderneta eskolár ne’e prodús filafali tanba hetan ona modifikasaun, ne’ebé uluk estudante ida hetan kaderneta tolu maibé agora hetan ida de’it.
Aleinde ne’e, Xefe Departementu ne’e konfesa katak UKN iha planu atu halo produsaun kaderneta eskolár hamutuk 80.000, maibé kapasidade mákina produsaun iha sentru impresaun Comoro kiik, entaun labele simu dala-ida, ho nune’e produsaun ne’e prodús tur etapa.
“Etapa dahuluk prodús uluk kaderneta 40.000 ne’ebé oras ne’e daudaun hahú halo ona distribuisaun ba eskola ensu báziku iha munisípiu sira. Bainhira atu halo produsaun ba kaderneta eskolár siklu 1,2 ne’e presiza tempu naruk tebes tanba tenke prepara esbosu hafoin halo konsultasaun ho profesór sira iha territóriu nasionál no ikus mai foin hamosu formatu finál ida hodi aprezenta ba ministru hodi bele hetan legalidade. Nune’e, liuhosi despaixu ministru fó biban ba UKN hodi husu ba sentru impresaun bele hahú halo prosesu impresaun,” nia tenik.
Jornalista : Tomé Amado
Editora : Julia Chatarina
