BAUCAU, 24 agostu 2022 (TATOLI) – Klínika Veteranu David Alex ‘Daitula’ Baucau rejista moras Infeksaun Respiratória Aguda (IRA) no ipertensaun ne’ebé sofre hosi veteranu sira.
Koordenadór Klínika Veteranu David Alex ‘Daitula’ Baucau, Leonel Guterres, esplika, totál pasiente ne’ebé sofre moras IRA hamutuk na’in-235, ipertensaun 283.
Nune’e mos artiris remátiku hamutuk 28, gastritis (gastrite) 111, rins 48, diabetes 32, pulmaun króniku 27, moras-kulit 37, próstata 20, stroke tolu, tiroid 33, TBC ualu no moras seluk hamutuk 654 .
Klínika Veteranu David Alex Daitula, rejista tipu moras hirak-ne’e hahu hosi fulan-abríl to’o juñu.
“Di’akliu maluk veteranu sira mai halo tratamentu atu moras ne’ebé afeta bele deteta lalais, idade bele avansa maibé aumenta loron moris ne’e importante liu,” Koordenadór Klinika Veteranu Baucau hateten iha Vila Antiga, kuarta ne’e.
Klínika veteranu rejista trimestre daruak pasiente sira-ne’ebé mai hosi veteranu maioria sofre moras tolu hanesan tensaun-aas, rematismu, diabetes, rins no pulmaun króniku.
Nune’e mós pasiente ne’ebé hala’o ona operasaun tantu boot no ki’ik hamutuk na’in-28 hafoin deteta moras hanesan kakorok bubu, rins inklui hasai munisaun iha isin ne’ebé hetan rekomendasaun no akompaña hosi duótor klinika hodi kontinua halo operasaun iha ospitál rejionál Baucau.
Enkuantu moras seluk hanesan TBC, pasiente sira sei hetan karta rekomendasaun no halo monitorizasaun hosi klínika veteranu atu kontinua halo tratamentu iha kada sentru saúde tuir lokalizasaun pasiente hela ba.
“Moras ne’ebé presiza fó atensaun mak tiroid ka kakorok bubu ne’e mesmu kazu na’in-33 maibé sériu presiza fó atensaun hanesan hala’o operasaun ne’ebé bele hala’o iha HoREX Baucau,” Leonel Guterres akresenta.
Klínika refere hala’o tratamentu movel ba veteranu sira iha postu admistrativu sira bazea ba orientasaun hosi Konsellu Munisipál Kombatente Libertasaun Nasionál (CMCLN, sigla portugés) hanesan Baguia, Vemasse, Baucau Vila tanba tuir kondisaun saúde.
totál pasiente veteranu sira-ne’ebé utiliza fasilidade no hala’o tratamentu durante fulan-tolu hamutuk 2.046, komposta hosi mane na’in-1.155 no feto na’in-891. Enkuantu komunidade jerál hamutuk na’in-1.095 komposta hosi mane 747 no feto 348.
Notisia relevante: MAKLN apoia orsamentu rihun $30 ba klínika veteranu David Alex
Jornalista : Natalino Belo
Editór : Evaristo Soares Martins
