PN TL-PN Indonézia hala’o kooperasaun iha área mídia-protokolu parlamentár
DILI, 24 agostu 2022 (TATOLI)—Prezidente Parlamentu Nasionál Timor-Leste, Aniceto Longuinhos Guterres Lopes, halo vizita traballu ba Indonézia hasoru malu ho nia ómologu Prezidente Parlamentu Indonézia (Ketua DPR-RI), Puan Maharani, hala’o kooperasaun iha área protokolu parlamentár no mídia.
Notísia Relevante: PR Horta vizita Parlamentu Nasionál
“Vizita Prezidente Parlamentu Nasionál akompaña mós grupu amizade Parlamentu Nasionál Timor-Leste ba Indonézia hodi hala’o kooperasaun iha área mídia no protokolu parlamentár ho objetivu hametin amizade entre Parlamentu Nasionál rai rua nian,” refere komunikadu imprensa ne’ebé Agência TATOLI asesu, kuarta ne’e.
Asuntu importante ne’ebé mak ko’alia iha enkontru ne’e mak hametin nafatin lasu amizade entre nasaun rua, liu-liu fallow-up kooperasaun sira-ne’ebé Estadu rua halo tiha ona, hanesan iha área ekonómia no oinsá dezenvolve ekonómia entre nasaun rua.
Iha enkontru ne’e, diskute no identifika obstaklu saida mak rai rua ne’e hasoru, nune’e rezolve hodi haree ba posiblidade investimentu ne’ebé bele konkretiza liu-liu merkadu fronteira TL ho Indonézia, hametin relasaun kulturál entre RI no TL.
Hasoru malu entre PPN ho nia ómologu ne’e diskute mós problema estudante Timoroan ne’ebé agora daudaun hala’o estudu iha Indonézia hanesan problema kitas,visa no propina
Vizita PPN ne’ebé akompaña hosi Deputadu Grupu Amizade Parlamentu Nasionál Timor-Leste ba Indonézia, ko’alia mós kona-ba rate eroi TL ne’ebé mate no lakon iha prosesu luta libertasaun nasionál.
Notísia Relevante: Aniceto Guterres-Puan Maharani diskute futuru kooperasaun iha Áustria
Jornalista : Nelson de Sousa
Editór : Cancio Ximenes
