DILI, 25 agostu 2022 (TATOLI)—Delegasaun Prezidente Parlamentu Nasional, Aniceto Longuinhos Guterres Lopes, akompañadu hosi Deputadu Grupu Amizade Parlamentár Timor-Leste ba Parlamentu Indonézia (DPR-RI), vizita no kari ai-funan iha saudoza Ibu Ade Rostina Sitompul, ne’ebé uluk hanesan aktivista umanidade ne’ebé apoiu maka’as Timor-Leste nia independénsia.
Notísia Relevante: PN TL-PN Indonézia hala’o kooperasaun iha área mídia-protokolu parlamentár
“Hafoin kari aifunan ba rate Ibu Ade Rostina Sitompul, delegasaun Prezidente Parlamentu Nasional mós hasoru malu ho grupu solidaridade ne’ebé iha tempu rezisténsia apoiu maka’as Timor-Leste nia independénsia iha prosesu luta libertasaun nasionál no luta ba demokrásia iha Indonézia rasik,” refere komunikadu imprensa ne’ebé Agência TATOLI asesu, kinta ne’e.
Prezidente Parlamentu Nasional, Aniceto Guterres, hateten gupu solidaridade ne’e kompostu hosi estudante Timoroan ho Indonézia ne’ebé ejiste ho objetivu luta ba Independénsia Timor-Leste no demokrásia ba Indonézia.
Tuir Nia, ohin loron Timor-Leste hetan ona nia Independénsia, demokrásia la’o di’ak tebes maibé la akompaña ho dezenvolvimentu ne’ebe di’ak.
“Tanba ne’e palavra aluta kontinua tenke hakilar nafatin maibé luta ho demisaun foun mak lori dezenvolvimentu no prosperiedade ba povu,” nota ne’e haktuir.
Iha fatin hanesan, reprezentante grupu solidaridade Indonézia ba Timor-Leste, Joshon Panjaitan, hateten sorumutu ne’e importante tebes hodi hametin nafatin lasu amizade entre grupu solidaridade no ativista direitu umanu no demokrásia entre nasaun rua ne’e.
Importante iha liberdade no demokrásia ne’e labele haluha, prinsípiu ne’ebé uluk defende.
‘Labele lori razaun dezenvolvimentu hodi haluha, prinsípiu ne’ebé uluk ita defende, satán haluha ami besik liu ba (sira) ne’ebé ideia la hanesan ho ita,” nia hateten.
Ativista sira-ne’ebe hasoru malu ho delegasaun Prezidente Parlamentu Nasional mak hanesan Eis Romo Sandewa, Joshon Panjaitan, Dedi Syech, Wilson, Rico Aditjondro, Hilman Farid no sira seluk.
Jornalista : Nelson de Sousa
Editór : Cancio Ximenes
