VIQUEQUE, 25 agostu 2022 (TATOLI)--Diresaun Nasionál Transporte Terrestre (DNTT) nasionál, kinta ne’e, halo diseminasaun kódigu estrada ba abitante sira iha munisípiu Viqueque.
Objetivu atividade ho tema “mai ita hametin disiplina uza dalan públiku hodi prevene asidente” mak atu hasa’e koñesimentu abitante hodi prevene asidente bainhira uza dalan públiku.
“Liuhosi diseminasaun ne’e, ita bele hatene oinsá prevene asidente tanba asidente ne’e mosu ita la espera. Atu prevene asidente maka liuhosi atividade hirak ne’e no ita tenke iha konsiénsia hodi uza dalan públiku,” Reprezenta DNTT nasionál, Maria Vitor da Costa, hateten iha ninia diskursu abertura diseminasaun, iha salaun administrasaun, kinta ne’e.
Notísia relevante: PNTL Baucau realiza atividade sosiál no sensibiliza Kódigu Estrada
Kona-ba halo manutesaun estrada no loke estrada hanesan kompeténsia Ministériu Obra Públika (MOP), maibé fasilidade estrada hanesan sinál tránzitu ne’e kompeténsia DNTT.
“Ha’u husu kondutór sira bainhira uza karreta sai hosi uma tenke haree uluk kareta sira-nia kondisaun viatura nian hanesan lampu, travaun, lampu piska no viatura tenke mós iha dokumentu. Bainhira kompleta hotu maka ita lori viatura ba dalan públiku,” nia akresenta.
Iha fatin hanesan, Komandante Polísia Nasionál Timor Leste (PNTL) munisípiu Viqueque, Superentendente Polísia, Sebastião Alves Quintão, konsidera, kodigu estrada sai hanesan asuntu importante liu ba diseminasaun hodi rona informasaun hosi utilizasaun estrada.
“Ha’u hanoin sosializasaun ne’e importante tebes ba ita hodi bele hatene utilizasaun estrada no oinsá maka uza dalan ho disiplina,” nia akresenta.
Nia haktuir, uluk iha munisípiu Viqueque ema utiliza transporte la tuir regra, motoriza ida iha ema na’in-tolu maka tula malu no la uza kapasete.
“Agora la’e, bainhira ha’u hetan sira la uza kapasete maka ha’u buka tuir tenke hetan kaer. Ami implementa hotu ona iha postu lima ne’ebé sidadaun sira kuandu la’o tenke uza kapasete. Atu kondús karreta no motórizada iha estrada públiku tenke respeita kódigu estrada. Tanba ne’e hosi diseminasaun ne’e ba abitante utilizadór transporte bele kompreende,” nia tenik.
Nune’e mós, utilizadór via públiku bainhira lori transporte ba estrada públiku tenke iha dokumentu hanesan karta kondusaun no bainhira kondús transporte labele konsumu alkool iha estrada públiku.
Iha biban hanesan, Administradór munisípiu Viqueque, Januário Soares ‘Bolly’, husu sidadaun sira iha munisípiu Viqueque tenke kumpre kódigu estrada no DNTT presiza halo sosializasaun ba eskola sira atu estudante sira kumpriende.
“Ha’u hanoin diseminasaun ne’e presiza fahe mós ba ita-nia estudante no joven sira. Tanba dala barak joven sira maka ladún respeita kódigu estrada,” nia hato’o.
Atividade ne’e partisipa hosi Komadante Polísia Tránzitu Nasionál no hetan partisipasaun másimu hosi funsionáriu sira iha munisípiu Viqueque.
Jornalista : Vitorino Lopes da Costa
Editora : Julia Chatarina
