iklan

EDUKASAUN, HEADLINE

Estudante 18.799 iha Liquiçá simu kaderneta eskolár foun

Estudante 18.799 iha Liquiçá simu kaderneta eskolár foun

Kaderneta Eskolár. Imajen/Espesiál

DILI, 25 agostu 2022 (TATOLI)–Diresaun Servisu Edukasaun Munisípiu Liquiçá (DSEML) simu ona kaderneta eskolár hosi Ministériu Edukasaun Juventude no Desportu (MEJD) liuhosi Unidade Kurríkulu Nasionál (UKN) atu fornese hikas ba estudante hamutuk 18.799 iha eskola ensinu báziku siklu 1,2 munisípiu Liquiçá.

Diretór Servisu Edukasaun Munisípiu Liquiçá, Carlos Lopes, relata daudaun ne’e simu ona kaderneta hamutuk kaixa tolu maibé sei falta tan kaderneta kaixa lima maka sei haruka mai, atu nune’e DSEML bele halo distribuisaun.

“Ita iha kompromisu katak molok halo distribuisaun kaderneta eskolár ba estudante sira tenke halo mós formasaun ba profesór sira atubele hatene oinsá bele prenxe kaderneta eskolár foun. Formasaun ne’e sei halo iha semana ne’e ba profesór Ensinu Báziku hamutuk 579 no formasaun ne’e sei fó hosi dirijente sira hosi eskola sentrál,” Diretór informa ba Agência Tatoli, via telefónika, kinta ne’e.

Notísia relevante: MEJD sei introdús kaderneta eskolár foun ba nível ensinu báziku

Tuir Diretór, kaderneta foun di’ak liu do que kaderneta uluk tanba agora estudante sira uza de’it kaderneta ida, enkuantu kaderneta anteriór, estudante ida kaer kaderneta tolu.

Aleinde ne’e, antes ne’e distribui ona ba eskola iha munisípiu Lautém no Rejiaun Administrativa Espesiál Oé-cusse Ambeno (RAEOA) maibé parte DSEML seidauk konfirma dadus.

Totál profesór ne’ebé eziste iha eskola edukasaun pre-eskolár, ensinu báziku, ensinu sekundáriu jerál no tékniku vokasionál iha Liquiçá hamutuk 816, maibé atu klasifika profesór ensinu báziku iha 579.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!