MPO konsulta planu munisipál iha Oé-Cusse hodi reajusta PED 2011-2030
OÉ-CUSSE, 25 agostu 2022 (TATOLI) – Governu liuhosi Ministériu Planu no Ordenamentu (MPO), José Maria dos Reis, kinta ne’e lansa konsulta públika kona-bá reajustamentu Planu Estratéjiku Dezenvolvimentu (PED) períodu 2011-2030 iha Rejiaun Administrativa Espesiál Oé-Cusse Ambeno (RAEOA).
Iha diskursu, Vise-Primeniru Ministru no Ministru Planu Ordenamentu, José Maria dos Reis, hatete, konsulta públika ne’e importante tebes hodi reajustamentu Planu Estratéjiku Dezenvolvimentu ho vizaun 2011-2030.
“Ita atu hatene loloos la’o iha dalan loos ka dalan sala, sei ita la’ o iha dalan sala, ita tenke tenta atu haloos fila-fali, ita iha tinan sia ka 10, atu responde ba dezafiu boot ida atu lori Estadu ne’e ba dalan loos, sei ita la hatán situasaun ne’e ho loos ita sei la’o sala dalan, tàn ne’e konsulta públika ne’e importante tebes” José Reis, ko’alia iha lansamentu PED hala’o iha Otél Ambeno.
Nia afirma, povu Timor-Leste restaura nia independénsia iha ona instrumentu planeamentu rua, atu halo, iha ekipa nasionál ida, ne’ebé mak lidera hosi Kay Rala Xanana Gusmão ho Mari Alkatiri, kestaun téknika elaborasaun, Mari Alkatiri ninia responsabilidade,
Nune’e halo konsultasaun ida kuaze rihun 38 sidadaun atu husu loos hanoin saida mak ita atu halo dezenvolvimentu iha ita-nia rain, iha área haat importante tebes edukasaun, agrikultura, saúde ho infraestrutura,
“Tán ne’e, ha’u la mai halo buat foun ida, ha’u kaer nafatin dokumentu sira-ne’ebé Governu anteriór halo, mai atu finaliza halo ajustamentu no reajustamentu ba prosesu ida-ne’e, tanba Governu instituisaun ida atu fó kontinuidade, saida mak ladi’ak ita tenta reajusta iha situasaun momentu ida-ne’e,” nia afirma.
Nia fundamenta, Guvernu foti desizaun ida-ne’e, katak rezultadu avaliasaun implementasaun ba tinan 10 hatudu katak meta balu la atinje, maibé barak mós seidauk atinje, no balu seidauk hahú no balu atinje ona, maibé rezultadu hosi avaliasaun implementasaun sira-ne’e, tenke ezekuta entre 2011 to’o 2015 no konklui de’it persentajén balun.
Tuir nia, Planu Estratéjiku Dezenvolvimentu 2011-2030 iha faze tolu, faze dahuluk 2011-2015, faze daruak 2015-2020 no faze datoluk maka 2021-2030.
Rezultadu iha 2021 hosi meta ne’ebé maka hala’o ona mós ita kuaze atinje 40%, medida estratéjiku sira-ne’e, define iha planu ne’e barak mak jerál liu, laiha klaru iha indikadór nomoos susar tanba laiha indikadór klaru, labele sukat no susar halo monitorizasaun no avaliasaun ba nia implementasaun.
“Ho hanoin sira-ne’e maka Ministériu Planu Ordenamentu Territóriál, bainhira atu lansa instrumentál sira-ne’e ami tún mai atu rona opiniaun hosi povu, tanba bainhira ita ko’alia ba ordenamentu territóriu ema mak hela iha laran, entaun tenke husu sira-nia opiniaun, tanba sira mak hela iha espasu nia laran, atu ita bele halo di’ak ba povu,” nia tenik.
Prezidente Autoridade RAEOA, Arsénio Paixão Bano, orgullu ba Governu Sentrál tanba konsulta públika ne’e importante ba entidade sira iha Oé-Cusse atu iha koñesimentu hodi kontribui ideia ba prosesu dezenvolvimentu iha futuru.
“Ohin ita akompaña aprezentasaun konsulta públika importante tebes ba RAEOA, konsulta ne’e sai importante liu-liu ba diresaun planu iha Sekretáriu Rejionál Finansa nian, nomoos unidade ordenamentu inklui servisu hotu atu rona no fó opiniaun, tanba iha tempu badak RAEOA mós tama ona reajustamentu planu estratéjiku rejiaun nian,” nia orgullu.
Notísia relevante: Governu sensibiliza Lei Ordenamentu Territóriu ba entidade RAEOA
Jornalista: Abílio Elo Nini
Editór: Evaristo Soares Martins
