OÉ-CUSSE, 25 agostu 2022 (TATOLI) – Governu liuhosi Vise-Primeiru Ministru Planu no Ordenamentu (MPO), José Maria dos Reis, tau importánsia ba instrumentu ordenamentu territoriál hodi garante dezenvolvimentu integradu no sustentável iha Timor-Leste.
Ministru Planu no Ordenamentu, José Maria dos Reis, informa, iha segunda faze nian VIII Governu Konstitusionál mai ho estrutura foun hodi troka Ministériu Planeiamentu Investimentu Estratéjiku (MPIE) ba iha Ministériu Planu Ordenamentu (MPO).
José Reis argumenta, razaun hatuur Ministériu Planu Ordenamentu, tanba Ministériu Planeiamentu Investimentu Estratéjiku, ne’e prosesu ida atu hala’o, maibé prosesu ne’e presiza iha instrumentu planu.
“Instrumentu ordenamentu territóriu importante tebes, atu lori ita atubele hala’o dezenvolvimentu, bainhira instrumentu ne’e laiha, susar ita atu la’o, oinsá halo dezenvolvimentu maibé bele mós estraga ambiente, entaun bainhira ita ko’alia kona-bá dezenvolvimentu integradu no sustentável, siginifika ordenamentu ne’e importante tebes,” nia akresenta.
Nia afirma, bainhira hala’o dezenvolvimentu la integradu sei laiha sustentável, tán ne’e Ministériu Planu Ordenamentu iha kna’ar rua importante, primeiru kona-bá planu estratéjiku no segundu maka planeamentu territóriu.
“Maibé ha’u foku liu ba kna’ar rua ne’e, planu nasionál ordenamentu territóriu dokumentu ne’e kuaze 80% ona ami atu remata, ho reajustamentu ba iha planeamentu estratéjiku vizaun 2011-2030,” José Reis, ko’alia iha ámbitu konsulta públika ba reajustamentu PED 2011-2023, iha otél Ambeno, kinta ne’e.
Nune’e setór rua ne’e interligadu no interdependente ba dezenvolvimentu nasionál, iha dezempeñu atribuisaun rua ne’e, MPO dezenvolve daudaun instrumentu planeamentu rua ne’e, planu nasionál ordenamentu no planu estratéjiku ne’ebé halo hamutuk.
Notísia relevante: MPO konsulta planu munisipál iha Oé-Cusse hodi reajusta PED 2011-2030
Jornalista: Abílio Elo Nini
Editór: Evaristo Soares Martins
