DILI, 26 agostu 2022 (TATOLI)–Diresaun Servisu Edukasaun Munisípiu Viqueque simu kaderneta eskolár foun hamutuk 4.000 resin hosi Unidade Kurríkulu nasionál Ministériu Edukasaun Juventude no Desportu (MEJD).
Diretór Servisu Edukasaun Munisípiu Viqueque, Emídio Amaral, relata, kaderneta eskolár ne’ebé sira simu, balun fahe ona ba eskola balun no sei falta eskola lubuk ida mak seidauk foti.
“Espera katak bainhira prosesu ensinu aprendizajen hahú filafali, parte Servisu Edukasaun Munisípiu Viqueque bele distribui tan ba eskola sira seluk,” Diretór hateten ba Agência Tatoli, via telefónika, sesta ne’e.
Notísia relevante: Estudante 18.799 iha Liquiçá simu kaderneta eskolár foun
Maski nune’e, tuir Diretór, sei presiza tan kaderneta eskolár kuaze 1.000 resin tan tanba sira iha totál estudante ensinu báziku siklu 1,2 hamutuk 14.000 resin, maibé bainhira atu distribui hotu ona ba eskola 21 iha Viqueque, maka sei ba foti tan iha nasionál.
“Ita hahú ona distribui kaderneta sira ba eskola balun no sei falta eskola lubuk ida mak seidauk mai foti. Ita sei falta tan kaderneta eskolár foun hamutuk 1.000 resin atu nune’e bele kompleta estudante 14.000 resin hosi ensinu báziku siklu 1,2 iha Viqueque,” nia akresenta.
Aleinde ne’e, Servisu Edukasaun Munisípiu Viqueque simu kaderneta antigu hamutuk 400 resin atu distribui ba estudante ensinu sekundáriu tékniku vokasionál sira maibé númeru estudante la to’o 400, tanba ne’e kaderneta ne’ebé restu hela ba tinan oin.
Enkuantu, totál profesór ensinu báziku iha eskola 21 iha Viqueque hamutuk 800 maka sei tuir filafali formasaun atubele prienxe kaderneta ne’e.
“Kaderneta eskolár ne’e sensitivu tebes kuandu prienxe la loos sei la uza tan,” nia tenik.
Jornalista : Tomé Amado
Editora : Julia Chatarina
