DILI, 26 agostu 2022 (TATOLI)–Servisu Rejistrasaun no Verifikasaun Emprezariál, Institutu Públiku (SERVE, I.P), labele halo rejistu via eletrónika, liuliu ba atendimentu públiku tanba lei númeru 16/2017 kona-ba rejistu komersiál la permite no permite de’it mak rejistu manuál ka hasoru malu ema ho ema.
“Ha’u konkorda tebes ho preokupasaun públiku katak atendimentu SERVE, I.P seidauk másima, maibé ami iha ona sistema ida hanaran Sistema Integradu SERVE (SIS), maibé labele implementa tanba lei rejistu komersiál la permite atu halo rejistu via eletrónika, ne’e dezafiu boot ne’ebé ami hasoru,” Diretór Ezekutivu SERVE, I.P, Florêncio Sanches, hateten, iha salaun Delta Nova, Comoro, sesta ne’e.
Notísia relevante: Sekretariadu OMK realiza konsulta públika ba funsionáriu SERVE, I.P
Nia konsidera, utiliza sistema dijitalizasaun ba atendimentu públiku ne’e importante tebes, hafoin dijitaliza tenki simplifika entaun buat rua ne’e tenki la’o hamutuk ho lei ida.
Daudaun ne’e SERVE, I.P prepara hela esbosu revizaun ba lei nune’e tempu badak lori ba Konsellu Ministru.
“Hakarak ka lakohi ami servisu hamutuk atu nune’e revizaun ba lei ne’e lalais, nune’e implementa ona sistema SIS ne’e se lae atu la’o ba oin maibé hakiduk fali. Tanba ne’e maka ideia sira ne’e ha’u hato’o ona ba gabinete Ministru Koordenadór Asuntu Ekonómiku atu nune’e bele haree lalais, tanba rekezitu ne’ebé mai hosi OMK presiza duni atendimentu públiku dijitalizasaun,” nia akresenta.
Nia konta katak iha tinan 2017 envolve halo lei rejistu komersiál, iha tempu ne’ebá tau ona iha artigu ida hateten katak permite SERVE, I.P halo rejistu eletrónika futuru.
Jornalista : Antónia Gusmão
Editora : Julia Chatarina
