iklan

HEADLINE, MANUFAHI, MUNISÍPIU

MOP inaugura liña eletrisidade iha suku rua Manufahi

MOP inaugura liña eletrisidade iha suku rua Manufahi

Ministru Obra Públika, Abel Pires, akompaña ho líder komunitáriu no entidade relevante halo inaugurasaun liña eletrisidade iha suku Grotu, postu administrativu Same vila, munisípiu Manufahi, sesta (26/08). Imajen Tatoli/Arminda Fonseca

MANUFAHI, 26 agostu 2022 (TATOLI)–Ministru Obra Públika (MOP), Abel Pires, akompaña ho ninia komitiva, sesta ne’e, halo inaugurasaun ba liña eletrisidade iha suku Dae-sua no Grotu iha postu administrativu Same vila, munisípiu Manufahi.

Biban ne’e, Ministru Obra Públika, Abel Pires, hato’o parabéns ba komunidade suku rua ne’ebé bele asesu ona ba liña eletrisidade.

“Ha’u husu komunidade kuidadu sasán sira, nune’e ita bele suporta malu ba dezenvolvimentu nasaun,” Ministru hateten iha ámbitu serimónia inaugurasaun liña eletrisidade iha suku Dae-sua, sesta ne’e.

Iha biban hanesan, Prezidente Konsellu Administrasaun Eletricidade de Timor-Leste, Empreza Publika (EDTL, E.P), Paulo da Silva, hateten, programa eletrifikasaun iha tinan kotuk EDTL, E.P promove projetu faze dahuluk iha pakote 34 ne’ebé kobre suku 24, ne’ebé maioria implementa ona, balun atinje ona 100% hodi halo inaugurasaun no balun iha hela faze finál.

“Faze daruak implementa projetu pakote 44 ba suku 17 iha semana kotuk, ne’ebé maioria ita asina ona kontratu, hela ida ka rua semana oin sei asina tan ho empreza sira atu hahú mobiliza materiál hodi implementa ona, no faze datoluk daudaun halo hela avaliasaun tékniku hafoin ba prosesu aprovizionamentu la’o sei kobre suku 23, semana rua tan empreza manán-na’in bainhira iha ona sei selebra kontratu ho EDTL, E.P no sei hahú implementa obra iha Timor laran tomak,” Paulo da Silva informa.

Notísia relevante: EDTL, E.P inaugura liña eletrisidade ba uma-kain 219 iha aldeia Weberek

Ministru Obra Públika, Abel Pires, akompaña ho líder komunitáriu no entidade relevante halo inaugurasaun liña eletrisidade iha suku Dae-sua, postu administrativu Same vila, munisípiu Manufahi, sesta (26/08). Imajen Tatoli/Arminda Fonseca

Suku hotu agora promove ona, maibé agora hela suku tolu mak seidauk asesu ba liña eletrisidade hanesan Fatumean-Fohoren-Covalima, Fatukalu-Same-Manufahi, no Fatuk-Makerek-Manatuto.

“Ida-ne’e tarde oituan tanba fulan hirak ba kotuk iha udan boot no mota boot halo estrada asesu ladi’ak, entaun EDTL, E.P nia tékniku sira tarde oituan halo levantamentu foti dadus. Agora sira finaliza ona dadus no dezeñu estimasaun, inklui kustu sosa materiál no semana rua tan ita sei promove loke konkursu ba suku tolu ne’e. Ita-nia espetativa bele promove hotu ona obra ba suku tinan ne’e, nune’e maioria tenke asesu ona liña eletrisidade,” nia akresenta.

Aleinde ne’e, hela aldeia balun mak seidauk asesu liña eletrisidade, tanba ne’e daudaun EDTL, E.P sosa ona materiál eletrisidade, ne’ebé daudaun iha prosesu konkursu nune’e la to’o fulan-ida empreza responsável sei hatama materiál hodi bele halo serbisu ba aldeia sira ne’ebé iha distánsia kilómetru ida ka rua hosi estrada no sei serbisu hamutuk ho komunidade ajuda dada ahi.

“Maibé ba aldeia sira ne’ebé ho distánsia dook hosi estrada hanesan kilómetru lima ba leten, tékniku sira daudaun hahú halo levantamentu dadus hafoin prepara dezeñu no estimasaun ba kustu. Ita sei loke konkursu tanba ita-nia alvu ramata tinan ne’e,” nia tenik.

Líder komunitáriu agradese

Xefe suku Dae-sua, Amorin Sarmento, informa, suku ne’e rasik iha aldeia lima hanesan Riatu, Lesuai, Lesulau Dae-sua no Loti, ho uma-kain 621 ho totál populasaun 3.200 resin.

“Agradese ba Governu tanba tinan 45 hahú hosi tempu portugés to’o ukun-an ami foin hetan ahi nia naroman. Ami-nia suku ohin hetan ona naroman, suku ne’e rasik iha aldeia lima, ne’ebé aldeia rua ho balun hetan ahi nia naroman maibé iha aldeia rua ho balun seidauk hetan, nune’e ajuda hau-nia komunidade hotu bele asesu ahi,” nia husu.

Xefe suku Grotu, postu administrativu Same vila, munisípiu Manufahi, Filomeno dos Santos, hamonu matan been ho sentimentu kontente hodi hato’o agradese ba Governu tanba tinan naruk nia-laran moris iha nakukun maibé ohin komunidade bele asesu ona liña eletrisidade.

“Ha’u kontente tebes tanba bele hetan ona liña eletrisidade. Suku ne’e iha uma-kain 400 ho totál populasaun  1.441, ne’ebé iha aldeia tolu hanesan Colidasi, Datorae no Leodato maibé agora falta uma-kain 17 mak seidauk asesu ahi, nune’e ha’u husu Governu ba oin tenke tau-atensaun atu komunidade sira bele asesu hotu ahi nia naroman,” nia fó hanoin.

Projetu eletrifikasaun ne’e ezekuta hosi empreza lokál, Rialecu Unipessoal Lda, ho konsórsiu hosi empreza  Capitaun Hook Unipessoal Lda, ho kustu projetu $407.000.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!