DILI, 26 agostu 2022 (TATOLI)—Diretór Ministériu Solidariedade Sosiál no Inkluzaun (MSSI), Florencio Pina Dias Gonzaga, hateten oras ne’e daudaun MSSI halo preparasaun no sei introdús faze daruak bolsa da mãe jerasaun foun ba munisípiu haat.
Notísia Relevante: Benefisiáriu elijivel 7,515 sei simu subsídiu bolsa da mãe jerasaun foun
“Tanba ne’e ita hakarak faze daruak tinan 2023 nian ne’e tenke introdús ona ba munisípiu haat (4) hanesan Covalima, Liquiça, Viqueque no Manatuto nian ne’ebé ho nia osan hamutuk $12,725,406,” Diretór Jerál ne’e informa ba Agência Tatoli, iha nia kna’ar fatin MSSI, Caicoli, Dili, sesta ne’e.
Tanba ne’e parte téknika sira hahú halo enkontru hodi oinsá bele halo preparsaun ba programa bolsa da mãe jersaun foun ne’ebé planu sei intródús iha munisípiu haat refere.
“Horisehik ita halo diskusaun ida ho téknika sira hosi Austrália ne’ebé mak durante ne’e servisu hamutuk ho ita hosi ba programa ne’e, katak posibilidade ita hala’o iha fulan-novembru no dezembru nia-laran,” nia dehan.
Bazea ba dekretu-lei 22/2021, 10 novembru, ha tinan 2022 ita sei implementa programa bolsa da mãe jersaun foun ba iha Ainaro, Bobonaro ho RAEOA depois iha tinan 2023 ne’e ita sei habelar no haluan tan ba munisipiu haat Liquiça, Covalima, Manatuto no Viqueque.
Programa refere sei implementa iha territóriu nasionál iha tinan 2024 no iha tinan ne’e, Governu sei finaliza programa bolsa da mãe jerasaun foun iha Timor-Leste liu-liu iha Aianro, Bobonaro dan RAEOA.
Tanba iha kompromisu katak programa bolsa da mãe jerasaun foun ne’e di’ak, tan ho nia objetivu atu redús probreza, atu redús má nutrisaun no mós raes badak iha Timor-Leste inklui estimula ekonómia familia, nune’e Governu hanoin no esforsu atu bele aselera no implementa programa ne’e iha nivel territóriu nasionál iha 2024.
Notísia Relevante: Asesu bolsa da mãe jerasaun foun, MSSI husu MS disponibiliza ‘LISIO”
Jornalista : Osória Marques
Editór : Cancio Ximenes
