DILI, 25 agostu 2022 (TATOLI)—Dirasaun Nasionál Asisténsia Sosiál (DNSA) iha Ministériu Solidariedade Sosiál no Inkluzaun (MSSI) rejistu benefisiáriu elijivel hamutuk 7.515 ne’ebé mak sei simu subsídiu ba bolsa da mãe jerasaun foun.
Notísia Relevante: MSSI husu BNCTL benefisiáriu “Bolsa da Mãe Jerasaun Foun” uza kartaun eleitorál
Diretór Dirasaun Nasionál Asisténsia Sosiál (DNSA), Lucas Tois, informa ministériu rejistu benefisiáriu elijivel 11,085 iha munisípiu Ainaro, Bobonaro no Rejiaun Administrativa Espesiál Oé-Cusse Ambeno (RAEOA).
Hosi totál benefisiáriu elijivel 11,085 ne’e, benefisiáriu hamutuk 7,515 mak sei simu subsídiu ba fulan ne’e ho montante $151,000-resin.
“Iha fulan-juñu, benefisiáriu elijivel 7,515 ho osan $63,000 ba inan isin-rua, labarik idade 0-3 no kontinua idade 6 ho labarik defisiénsia sira,” Diretór Dirasaun Nasionál Asisténsia Sosiál (DNSA) ne’e hateten ba Agência Tatoli, iha nia kna’ar fatin Caicoli, Dili, kinta ne’e.
Ho nune’e. nia husu ba benefisiáriu sira atu trata dokumentu nune’e bele simu subsídiu ne’e, tanba DNAS aprezenta ona proposta ba Ministériu Justisa atu disponibiliza apoiu ba benefisiáriu elijivel ne’ebé trata dokumentu iha Ainaro no Bobonaro.
Tanba, nia dehan, tuir benefisiáriu elijivel iha Ainaro no Bobonaro sei pendente hela maibé tanba de’it billete de identidade laiha maibé iha balun ne’ebé uza konta bankária BNU ho Mandiri simu ona.
Nia dehan, MSSI ho Minsitériu Saúde (MS) asina ona akordu ba programa bolsa da mãe jerasaun foun ho nia osan millaun $6.9 iha 07 juñu liubá, ne’ebé aprezenta hosi Ministra Solidariedade Sosiál no Inkluzaun, Armanda Berta dos Santos, ne’ebé aprova iha Konsellu Ministru iha fevereiru 2021.
Notísia Relevante: MSSI-BNCTL asina nota entendimentu ba pagamentu “bolsa da mãe jerasaun foun”
Jornalista : Osória Marques
Editór : Cancio Ximenes
