DILI, 26 agostu 2022 (TATOLI)— Ministériu Saúde (MS), planeia atu introdús vasina kontra moras pneumonia ka Pneumococcal conjugate vaccine (PCV), sarampu no rubéola ba labarik menus tinan lima, iha fulan-outubru tinan ne’e.
“Ohin, ami hamutuk ho parseiru sira hanesan UN ajénsia sira diskute kona-ba kampaña vasinasaun ne’ebé sei realiza iha fulan outubru hanesan vasina pneumonia ka PCV,rubéola, sarampu no fahe vitamina A inklui ai-moruk albendazole ba labarik sira,”Diretora Jerál Prestasaun Saúde Odete da Silva Viegas, hateten iha salaun MS Caicoli, sesta ne’e.
Daudaun, Ministériu Saúde hahú prepara materia no ekipamentu inklui medikamentu halo kampaña vasinasaun ba labarik sira ho idade menus tinan lima mai kraik no fahe mós informasaun ba inan-aman sira hodi hatene kona-ba kampaña ida ne’e.
“Kampaña vasinasaun ba ita nia oan sira menus tinan lima mai kraik signifika inan-aman tenke entende didi’ak katak vasina saida mak ita atu fó ba ita nia oan hodi prevene ki’ik-oan sira hosi risku moras hotu,” katak nian.
Ministériu Saúde aloka fundu millaun $2,7 hodi realiza kampaña vasinasaun ne’e.
Alende ne’e, Ministériu Saúde hamutuk ho Parseiru sira diskute mós kona ba preparasaun ba prevensaun virus monkeypox nomós preparasaun ba kazu dengue tanba fulan-oin mai tempu udan monu rai.
Notísia relevante: Juñu to’o jullu, MS rejista moras sarampu no rubéola aas iha munisípiu haat
Jornalista : Felicidade Ximenes
Editór : Florencio Miranda Ximenes
