DILI, 17 agostu 2022 (TATOLI)— Hahú hosi juñu to’o jullu, Ministériu Saúde liuhosi Diresaun Nasionál Saúde Públika, rejista moras sarampu no rubéola aas iha munisípiu Dili, Bobonaro, Covalima no Rejiaun Administrativa Espesiál Oé-Cusse no Ambeno (RAEOA).
“Durante fulan rua, ita deteta pozitivu ba moras sarampu no rubéola maioria labarik hamutuk 15, hosi númeru ne’e nai’n-ualu pozitivu ba sarampu no na’in-hitu pozitivu ba rubéola,” Diretór Nasionál Saúde Públika Ministériu Saúde, Frederico Bosco, hateten iha nia kna’ar fatin Caicoli, kuarta ne’e.
Ekipa Saúde deteta kazu hirak ne’e iha área fronteira entre Timor-Leste no Indonézia, hanesan Covalima, Bobonaro no RAEOA inklui Dili. Nune’e ekipa halo kedas rasteriu ba família na’in-sia no amostra sira ne’e sei prosesu konfirmasaun iha laboratóriu Táilandia.
“Labarik sira ne’ebé mak hetan moras sarampu no rubéola ne’e provavelmente sira la simu vasina no la simu vitámina A,” nia esplika.
Frederico Bosco rekoñese katak iha tinan-rua nia laran 2020 no 2021, Minsitériu saúde la halo imunizasaun rutina ba sarampu no rubéola ba labarik sira tanba Timor-Leste hasoru COVID-19.
Daudaun, Ekipa Vijilánsia halo intervesaun no prevensaun iha tereñu liuliu munisípiu haat ne’e hodi halo imunizasaun no fó vitamina A ba labarik sira.
Ministériu Saúde planu iha outubru tinan ne’e komesa halo kampaña prevensaun ba sarampu no rubéola ba iha komunidade sira.
“Ita halo kampaña hodi halo imunizasaun ba moras sarampu, rubéola, póliu no halo mós introdusaun vasina foun ba kankru serviks inklui halo kampaña distribuisaun vitamina A no ai-moruk albendazole,” nia afirma.
Moras Sarampu ho rubéola nia kauza mai hosi virus no da’et liuhosi kontaktu direta hosi ema ida ba ema seluk.
Jornalista : Felicidade Ximenes
Editór : Florencio Miranda Ximenes
